वीरगंज । पर्साको पोखरिया नगरपालिका–३, बसन्तपुरस्थित श्री नेपाल राष्ट्रिय प्राथमिक विद्यालयको भवन निर्माणका लागि ७६ लाख ५९ हजार ५ सय रुपैयाँ बराबरको सहयोग परियोजना स्वीकृत भएको छ ।
लायन्स क्लब्स इन्टरनेसनल डिस्ट्रिक्ट ३२५ एसको सम्पन्न प्रथम डिस्ट्रिक्ट क्याबिनेट बैठकले विद्यालय भवन निर्माणसम्बन्धी उक्त परियोजना स्वीकृत गर्ने निर्णय गरेको लायन्स क्लब अफ पोखरियाका अध्यक्ष लायन नेजामुद्दीन शमानीले जानकारी दिए । परियोजना अध्यक्ष शमानीको पहल, समन्वय र सक्रियतामा अघि बढाइएको जनाइएको छ ।
ग्रामीण क्षेत्रका बालबालिकालाई सुरक्षित, व्यवस्थित तथा गुणस्तरीय शैक्षिक वातावरण उपलब्ध गराउने उद्देश्यले अघि बढाइएको परियोजनाले विद्यालयको भौतिक पूर्वाधार विकासमा महत्वपूर्ण योगदान पुर्याउने अपेक्षा गरिएको छ ।
परियोजना स्वीकृतिका लागि पहल, समन्वय तथा सहयोग गरेको भन्दै लायन्स क्लब अफ पोखरिया परिवारले लायन्स क्लब्स इन्टरनेसनल डिस्ट्रिक्ट ३२५ एसका अध्यक्ष लायन रामबिहारी पाण्डेयसहित सम्पूर्ण पदाधिकारी, सदस्य तथा सहयोगीहरूप्रति आभार व्यक्त गरेको छ ।
यसै अवसरमा लायन्स क्लब अफ पोखरियाका अध्यक्ष लायन नेजामुद्दीन शमानीलाई लायन्स क्लबको पिन लगाई सम्मान गरिएको थियो। सम्मानबाट आफू अत्यन्तै खुसी र गौरवान्वित भएको बताउँदै शमानीले आफूलाई प्रदान गरिएको माया, विश्वास र सम्मानप्रति हृदयदेखि नै धन्यवाद तथा आभार व्यक्त गरेका छन् ।
परियोजनाले विद्यालयको शैक्षिक वातावरण सुधार गर्नुका साथै ग्रामीण क्षेत्रका बालबालिकाको शिक्षामा पहुँच र गुणस्तर अभिवृद्धिमा सहयोग पुग्ने विश्वास लिइएको छ ।
