वीरगंज । सडक निर्माण नै नगरी नक्कली बिल बनाएर रकम हिनामिना गरेको आरोपमा अख्तियार दुरुपयोग अनुसन्धान आयोगले १० जनाविरुद्ध विशेष अदालतमा मुद्दा दायर गरेको छ ।
धनुषाको धनौजी गाउँपालिका–२ स्थित गौरदाहादेखि लखौरीसम्मको सडक निर्माणको काम नै नगरी रकम भुक्तानी गरी हिनामिना गरेको पाइएपछि मुद्दा दायर गरिएको अख्तियारका प्रवक्ता सुरेश न्यौपानेले जानकारी दिए ।
अख्तियारले धनौजी गाउँपालिकाका तत्कालीन प्रमुख प्रशासकीय अधिकृत सावनकुमार चौधरी, लेखापाल राधेश्याम राय, खरिदार अरुणकुमार यादव, वरिष्ठ अहेव उमेर शाह, शिक्षा शाखा प्रमुख अनिलकुमार साहू, असिस्टेन्ट सब–इन्जिनियर शुभाषकुमार महरा, साइन कन्स्ट्रक्सन तथा सञ्चालक विकासप्रसाद यादव, एसकेवाई इन्जिनियरिङ एन्ड ट्रेडिङ प्रालि तथा सञ्चालक रामनारायण साहविरुद्ध मुद्दा दायर गरेको हो ।
त्यस्तै, अमृत मिडिया प्रालि तथा सञ्चालक राजेन्द्र यादव र जनकपुर टुडे मिडिया ग्रुप प्रालि तथा जनकपुर टुडेका प्रधान सम्पादक बृजकुमार यादवविरुद्ध पनि मुद्दा दायर गरिएको अख्तियारले जनाएको छ ।
अख्तियारका अनुसार तत्कालीन प्रमुख प्रशासकीय अधिकृत चौधरीसहित गाउँपालिकाका कर्मचारी र निर्माण कम्पनीको मिलेमतोमा सडक निर्माण नगरी नक्कली बिल तथा कागजात तयार गरी रकम भुक्तानी गरिएको थियो । उक्त कार्यबाट २६ लाख ६४ हजार ६२४ रुपैयाँ हिनामिना गरेको आरोप लगाइएको छ ।
यसैगरी, अमृत मिडियाका सञ्चालक राजेन्द्र यादव र जनकपुर टुडेका प्रधान सम्पादक बृजकुमार यादवले निर्माण कार्यको ठेक्कासम्बन्धी सूचना प्रकाशन गर्दा एउटा मात्रै पत्रिकामा सूचना प्रकाशित गरी प्रतिस्पर्धात्मक प्रक्रिया सीमित गर्ने तथा सूचना लुकाउने कार्यमा सहयोग गरेको आरोप अख्तियारले लगाएको छ ।
उनीहरूविरुद्ध २ लाख ४९ हजार ५०४ रुपैयाँ बिगो दाबी गरिएको अख्तियारका प्रवक्ता न्यौपानेले जानकारी दिए ।
अख्तियारले आरोपित सबैविरुद्ध भ्रष्टाचार निवारण ऐनबमोजिम कारबाही र बिगो असुलउपरको मागदाबी गर्दै विशेष अदालतमा मुद्दा दायर गरेको जनाएको छ ।
