वीरगंज । पर्सा प्रहरीले ७ ग्राम लागूऔषध ब्राउन सुगर जस्तो देखिने पदार्थसहित एक जना भारतीय नागरिकलाई पक्राउ गरेको छ ।
विशेष सूचनाको आधारमा जिल्ला प्रहरी कार्यालय पर्साबाट खटिएको प्रहरी टोलीले बुधबार दिउँसो वीरगंज महानगरपालिका–२१ परवानीपुर चोकस्थित सडकखण्डमा चेकजाँच गर्ने क्रममा उनलाई पक्राउ गरेको हो ।
प्रहरीका अनुसार जितपुरबाट वीरगंजतर्फ आउँदै गरेको भारतीय नम्बर DL12 CL 1984 को कारलाई रोकी जाँच गर्दा चालक बस्ने सिटको माथिल्लो भागमा प्लास्टिकभित्र लुकाइछिपाई राखिएको अवस्थामा ७ ग्राम ब्राउन सुगर जस्तो देखिने पदार्थ फेला परेको थियो ।
लागूऔषधसहित पक्राउ पर्नेमा भारत बिहार, पूर्वी चम्पारण, रक्सौल पुरैनिया लोहडिया वडा नं. ५ बस्ने ३१ वर्षीय दिनेश प्रसाद रहेका छन् ।
प्रहरीले बरामद लागूऔषध र सवारीसाधनसहित उनलाई नियन्त्रणमा लिई थप अनुसन्धान तथा आवश्यक कारबाही अघि बढाएको जिल्ला प्रहरी कार्यालय पर्साका प्रवक्ता तथा सूचना अधिकारी प्रहरी नायब उपरीक्षक चक्रबहादुर मल्लले जानकारी दिए । उनले लागूऔषध कारोबार तथा ओसारपसारविरुद्ध प्रहरीको कारबाहीलाई निरन्तरता दिइएको बताए ।
