वीरगंज । जिल्ला प्रहरी कार्यालय पर्साले वीरगंज महानगरपालिकाका विभिन्न स्थानबाट भन्सार छली चोरी पैठारी गरी नेपाल भित्र्याइएका १७ वटा भारतीय इलेक्ट्रिक स्कुटर नियन्त्रणमा लिएको छ ।
प्रहरीका अनुसार नेपालमा अनधिकृत रूपमा चलाइरहेको अवस्थामा बरामद गरिएका स्कुटरहरूको अनुमानित मूल्य १३ लाख ६० हजार रुपैयाँ रहेको छ ।
जिल्ला प्रहरी कार्यालय पर्साका प्रवक्ता तथा सूचना अधिकारी प्रहरी नायब उपरीक्षक चक्रबहादुर मल्लका अनुसार नियन्त्रणमा लिइएका भारतीय इलेक्ट्रिक स्कुटरहरू थप अनुसन्धान तथा आवश्यक कारबाहीका लागि वीरगंज भन्सार कार्यालयमा बुझाउने प्रक्रिया भइरहेको छ ।
प्रहरीले भन्सार छली चोरी पैठारी गरी नेपाल भित्र्याइएका तथा अनधिकृत रूपमा सञ्चालन भइरहेका सवारीसाधनमाथि निगरानी र कारबाहीलाई निरन्तरता दिइरहेको जनाएको छ ।
