वीरगंज । पर्सा क्षेत्र नं. १ का प्रतिनिधि सभा सदस्य हरि पन्तले जेन्जी आन्दोलनका क्रममा जेल परेका, मुद्दा खेपिरहेका र घाइते भएका युवाहरूलाई यथाशीघ्र न्याय दिन सरकारसँग माग गरेका छन् ।
प्रतिनिधि सभाको बैठकमा बोल्दै सांसद पन्तले बेथिति, दण्डहीनता र भ्रष्टाचारविरुद्ध जेन्जी युवाहरूले गरेको विद्रोह तथा अर्थपूर्ण राजनीतिक हस्तक्षेपलाई सम्मानपूर्वक स्मरण गर्नुपर्ने बताए ।
उनले तत्कालीन ओली सरकारले जेन्जी आन्दोलनका क्रममा गरेको निर्मम दमनपछि सरकारको पतनदेखि वर्तमान संसद् र सरकार गठनसम्म आइपुग्दा आन्दोलनकारी युवाहरूले देखेका सपना कति पूरा भए र कति पूरा हुने क्रममा छन् भन्ने विषय आफ्नै ठाउँमा रहेको बताए ।
तर आन्दोलनका धेरै योद्धाहरू अहिले पनि जेलमा रहेको, कतिपयले मुद्दा खेपिरहेको र कतिपय अझै फरार हुन बाध्य भएको भन्दै उनले सरकारको ध्यानाकर्षण गराए ।
सांसद पन्तले न्याय प्रणालीप्रति प्रश्न उठाउँदै भने, “गोली खाने र गोली खान तयार हुनेचाहिँ दोषी हुने अनि गोली हान्ने र गोली हान्न लगाउनेचाहिँ निर्दोष ठहरिने, यो कस्तो न्याय हो ?”
उनले जेन्जी आन्दोलनकै जगमा भएको निर्वाचनबाट आफू निर्वाचित भएको उल्लेख गर्दै आन्दोलनकारी युवालाई दोषी ठहर गरिए आफू पनि दोषी हुने तर्क गरे ।
“यदि ती भाइबहिनीहरू दोषी हुन् भने त्यही आन्दोलनको जगमा भएको निर्वाचनबाट निर्वाचित म पनि दोषी हुँ । यो सरकारका मन्त्रीहरू र प्रधानमन्त्री पनि दोषी हुन्,” उनले भने ।
सांसद पन्तले सभामुखमार्फत जेन्जी आन्दोलनका क्रममा जेल परेका, मुद्दा लागेका तथा घाइते भएका युवाहरूलाई तत्काल न्याय प्रदान गर्न सरकारको गम्भीर ध्यानाकर्षण गराए ।
