वीरगंज । राष्ट्रिय स्वतन्त्र पार्टी (रास्वपा) पर्साले भदौ १० गते भोटेकोसी नदीमा आएको विनाशकारी बाढीमा परी ज्यान गुमाएका नागरिकहरूको सम्झनामा दीप प्रज्वलन तथा श्रद्धाञ्जली सभाको आयोजना गरेको छ ।
उक्त महाविपत्तिमा ज्यान गुमाएकाहरूको तेह्रौं दिनको पुण्यतिथिको अवसर पारेर रास्वपा पर्साले सोमबार वीरगंजस्थित माइस्थान मन्दिर परिसरमा दीप प्रज्वलन एवं श्रद्धाञ्जली सभाको आयोजना गरेको हो ।
श्रद्धाञ्जली सभालाई सम्बोधन गर्दै रास्वपा पर्साका सभापति एवं पर्सा क्षेत्र नम्बर १ का सांसद हरि पन्तले भोटेकोसीको बाढीमा परी ज्यान गुमाएका नागरिकहरूप्रति भावपूर्ण श्रद्धाञ्जली व्यक्त गरेका थिए । उनले शोकसन्तप्त परिवारजनप्रति गहिरो समवेदना पनि प्रकट गरे ।
सांसद पन्तले बाढीमा परी बेपत्ता भएकाहरूको खोजी तथा उद्धार कार्यमा सरकारले कुनै पनि कसर बाँकी नराख्ने बताए । विपद्बाट प्रभावित परिवारलाई आवश्यक राहत तथा सहयोग उपलब्ध गराउन सबै पक्ष गम्भीर हुनुपर्नेमा समेत उनले जोड दिए ।
श्रद्धाञ्जली सभामा रास्वपा पर्साका कार्यवाहक सभापति तुल्सा पौडेल, सचिव सुदिश प्रजापति, क्षेत्रीय सभापतिहरू जितेन्द्र मिश्र र फैयाज मियाँ तथा पालिका सभापतिहरू रमाकान्त चौधरी, चन्दन यादव, सुदिल पटेल र माधव बस्नेतलगायतको उपस्थिति रहेको थियो ।
त्यस्तै, महमुद्दिन आलम, अक्षय द्विवेदी, गौतम श्रेष्ठ, सुमित चौरसिया, सम्साद अन्सारी, दीपेन्द्र मण्डललगायत पार्टीका नेता तथा कार्यकर्ताहरूको पनि सहभागिता रहेको थियो । कार्यक्रमको सञ्चालन कृष्ण पासवानले गरेका थिए ।
श्रद्धाञ्जली सभामा सहभागीहरूले दीप प्रज्वलन गर्दै बाढीको महाविपत्तिमा ज्यान गुमाएका नागरिकहरूको आत्माको चिरशान्तिको कामना गरेका थिए ।
