वीरगंज । पर्साको पकहामैनपुर गाउँपालिका–१ बाट प्रहरीले ठूलो परिमाणमा लागूऔषध गाँजासहित एक जनालाई पक्राउ गरेको छ।
शुक्रबार राति प्रहरी चौकी धोरे र इलाका प्रहरी कार्यालय पोखरियाको संयुक्त प्रहरी टोलीले पकहामैनपुर गाउँपालिका–१ अन्तर्गत तिलाईपुल–भिष्वा सडकखण्डमा चेकजाँच गर्ने क्रममा ११४ किलो २५ ग्राम गाँजा बरामद गरेको हो।
प्रहरीले तिलाईपुलतर्फबाट आउँदै गरेको बा १८ च ३६५७ नम्बरको निशान कारलाई रोकी चेकजाँच गर्दा कारको डिकीभित्र १२ वटा पोकामा राखिएको गाँजा फेला परेको थियो।
गाँजासहित कारका चालक धादिङको बेनिघाट रोराङ गाउँपालिका–८ निवासी २१ वर्षीय साजन चेपाङलाई नियन्त्रणमा लिइएको जिल्ला प्रहरी कार्यालय पर्साका सूचना अधिकारी प्रहरी नायब उपरीक्षक चक्रबहादुर मल्लले जानकारी दिए।
पक्राउ परेका चेपाङमाथि लागूऔषधसम्बन्धी मुद्दामा आवश्यक अनुसन्धान अगाडि बढाइएको प्रहरीले जनाएको छ।
