वीरगंज । बाराको फेटा गाउँपालिकाले रसुवाको भोटेकोशी नदीमा आएको विनाशकारी बाढीबाट प्रभावित क्षेत्रको राहत, उद्धार तथा पुनर्स्थापनाका लागि १९ लाख २ हजार ६३३ रुपैयाँ सहयोग गर्ने निर्णय गरेको छ ।
फेटा गाउँ कार्यपालिकाको बुधबार बसेको बैठकले प्रधानमन्त्री दैवी प्रकोप उद्धार कोषमा उक्त रकम सहयोग गर्ने निर्णय गरेको गाउँपालिका अध्यक्ष रुस्तम अन्सारीले जानकारी दिए ।
गत भदौ १० गते बिहान रसुवाको भोटेकोशी नदीमा आएको विनाशकारी बाढीका कारण रसुवा, नुवाकोट, धादिङ, गोरखा लगायत जिल्लाका तटीय क्षेत्रमा ठूलो जनधनको क्षति भएको भन्दै गाउँपालिकाले बाढीमा ज्यान गुमाउनेप्रति श्रद्धाञ्जली तथा शोकसन्तप्त परिवारप्रति हार्दिक समवेदना व्यक्त गरेको छ । साथै घाइतेहरूको शीघ्र स्वास्थ्यलाभको कामना गरिएको छ ।
कार्यपालिका बैठकले प्रभावित क्षेत्रमा खोज, उद्धार, राहत तथा पुनर्स्थापनाका लागि संघीय सरकार, प्रदेश सरकार, स्थानीय तह, नागरिक समाज, निजी क्षेत्र, संघसंस्था तथा आमनागरिकले आ–आफ्नो तर्फबाट सहयोग गर्नु मानवीय दायित्व र कर्तव्य भएको उल्लेख गरेको छ ।
गाउँपालिकाले विपद् व्यवस्थापन खर्च शीर्षकबाट ५ लाख ५ हजार रुपैयाँ सहयोग गर्ने निर्णय गरेको छ ।
त्यसैगरी निर्वाचित जनप्रतिनिधिहरूको सेवा–सुविधा शीर्षकबाट १ लाख ६ हजार २८३ रुपैयाँ संकलन गरिने भएको छ । उक्त रकम कार्यपालिका सदस्यहरूको सात दिनको सेवा–सुविधाबाट संकलन गरिने जनाइएको छ।
गाउँपालिका अन्तर्गत कार्यरत स्थायी तथा करार कर्मचारीहरूको तलब–भत्ता शीर्षकबाट ५ लाख ८५० रुपैयाँ सहयोग गरिनेछ । यसअन्तर्गत अधिकृत स्तरका कर्मचारीबाट सात दिनको तलब, सहायक स्तरका कर्मचारीबाट पाँच दिनको तलब तथा श्रेणीविहीन कर्मचारीबाट दुई दिनको तलब बराबरको रकम सहयोगका लागि उपलब्ध गराइने भएको छ ।
त्यसैगरी गाउँपालिका अन्तर्गतका विद्यालयका शिक्षक तथा कर्मचारीहरूको तलब–भत्ता शीर्षकबाट ७ लाख ९० हजार ५०० रुपैयाँ सहयोग गरिने निर्णय भएको छ । माध्यमिक तहका शिक्षकबाट सात दिनको तलब, निम्न माध्यमिक तथा प्राथमिक तहका शिक्षकबाट पाँच दिनको तलब तथा बालविकास शिक्षक, विद्यालय कर्मचारी र सहयोगी कर्मचारीबाट दुई दिनको तलब बराबरको रकम सहयोगस्वरूप संकलन गरिने गाउँपालिकाले जनाएको छ ।
यी विभिन्न शीर्षकबाट जम्मा १९ लाख २ हजार ६३३ रुपैयाँ प्रधानमन्त्री दैवी प्रकोप उद्धार कोषमा सहयोग गर्ने निर्णय गरिएको प्रमुख प्रशासकीय अधिकृत राकेश ओझाले जानकारी दिए ।
