वीरगंज । चाचान समूहका अध्यक्ष, वीरगञ्जका वरिष्ठ उद्योगपति तथा समाजसेवी बाबुलाल चाचानले प्रधानमन्त्री दैवी प्रकोप उद्धार कोषमा विभिन्न संस्थामार्फत गरी कुल ५२ लाख ११ हजार रुपैयाँ सहयोग गर्नुभएको छ ।
चाचान समूहअन्तर्गतका विभिन्न उद्योग तथा प्रतिष्ठानको तर्फबाट ५१ लाख रुपैयाँ तथा मारवाडी सेवा ट्रस्ट वीरगञ्जको तर्फबाट थप १ लाख ११ हजार रुपैयाँ सहयोग गरिएको हो ।
चाचान समूहअन्तर्गत नारायणी आयल रिफाइनरीबाट ४१ लाख रुपैयाँ, नारायणी मोर्डन प्लस इन्डस्ट्रिजबाट ५ लाख रुपैयाँ र आदर्श पोली प्लास्टिक प्रालिको तर्फबाट ५ लाख रुपैयाँ गरी जम्मा ५१ लाख रुपैयाँ प्रधानमन्त्री दैवी प्रकोप उद्धार कोषमा सहयोग गरिएको चाचान समूहले जनाएको छ ।
उक्त रकम एभरेस्ट बैंकमा रहेको प्रधानमन्त्री दैवी प्रकोप उद्धार कोषको खातामा जम्मा गरिएको हो ।
यसैगरी, मारवाडी सेवा ट्रस्ट वीरगञ्जका अध्यक्षसमेत रहनुभएका बाबुलाल चाचानले ट्रस्टको तर्फबाट १ लाख ११ हजार रुपैयाँ सहयोग गर्नुभएको छ। उक्त सहयोग रकमको चेक प्रधानमन्त्री दैवी प्रकोप उद्धार कोषको खातामा जम्मा गरिएको ट्रस्टका महासचिव नरेन्द्र साहले आज जानकारी दिनुभयो।
चाचान समूहका अध्यक्ष बाबुलाल चाचानले विपद् र संकटको समयमा एक नेपालीले अर्को नेपालीलाई सहयोग गर्नु आवश्यक रहेको बताउनुभयो।
उहाँले भन्नुभयो, “यस्तो दैवी प्रकोप र विपद्को समयमा हामी सबै नेपाली एकजुट भएर एक–अर्कालाई सहयोग गर्नुपर्छ। पीडित नागरिकको दुःखमा साथ दिनु हाम्रो सामाजिक दायित्व पनि हो।”
विपद्बाट प्रभावित नागरिकको राहत, उद्धार तथा सहयोगका लागि उक्त रकम प्रदान गरिएको जनाइएको छ । समाजसेवा र मानवीय सहयोगमा उद्योगी–व्यवसायी तथा सामाजिक संस्थाको पनि महत्वपूर्ण भूमिका रहने उल्लेख गर्दै चाचान समूह र मारवाडी सेवा ट्रस्टले आगामी दिनमा समेत आवश्यक सहयोगलाई निरन्तरता दिने प्रतिबद्धता जनाएका छन् ।
