चितवन । रसुवाको भोटेकोशी बाढीमा परी मृत्यु भएका र बगेर चितवनसम्म पुगेका पहिचान हुन नसकेका शवहरू संक्रमण फैलिन नदिन जमिनमा व्यवस्थापन गरिने भएको छ।
जिल्ला प्रशासन कार्यालयमा बसेको जिल्ला सुरक्षा समितिको बैठकले नदी किनार, होल्डिङ सेन्टर तथा विभिन्न स्वास्थ्य संस्थामा राखिएका शवहरू दुर्गन्धित हुन थालेपछि समाधिस्थ गर्ने निर्णय गरेको हो।
चितवनमा नारायणी र त्रिशूली नदी किनारबाट संकलन गरिएका २३३ शवमध्ये चार जनाको मात्रै पहिचान भएको र बाँकी २२९ शवको पहिचान हुन नसकेको प्रमुख जिल्ला अधिकारी गणेश अर्यालले जानकारी दिनुभयो। उहाँका अनुसार केही शव तथा शवका अवशेष सड्न थालेका छन् भने केही शव पहिचान गर्न नसकिने अवस्थामा पुगेका छन्।
स्वास्थ्य क्षेत्रका विज्ञहरूले लामो समयसम्म शव व्यवस्थापन नगर्दा संक्रमण तथा महामारी फैलिन सक्ने जोखिम औँल्याएपछि जिल्ला सुरक्षा समितिले तत्काल शव व्यवस्थापन गर्ने निर्णय गरेको प्रजिअ अर्यालले बताउनुभयो।
प्रशासनका अनुसार पहिचान नभएका तथा बेवारिसे शवलाई सम्मानजनक, सुरक्षित र कानुनी प्रक्रियाअनुसार व्यवस्थापन गरिनेछ। सबै शवको डीएनए नमुना संकलन गरी संकेत नम्बरका आधारमा अभिलेख राखिने जनाइएको छ।
निर्णयअनुसार आजदेखि भरतपुर महानगरपालिका–१, देवघाटस्थित खुला स्थानमा शव व्यवस्थापन सुरु गरिने प्रशासनले जनाएको छ।
जिल्ला प्रशासन कार्यालयले असाधारण परिस्थितिबाट सिर्जित अवस्थाका कारण शव व्यवस्थापन गर्नुपरेको भन्दै शोकमा रहेका पीडित परिवारप्रति सहानुभूति व्यक्त गरेको छ। प्रशासनले निर्णयलाई सकारात्मक रूपमा लिँदै आवश्यक सहयोग, समन्वय तथा सूचना सम्प्रेषण गरिदिन सम्बन्धित सबैसँग आग्रह गरेको छ।
