धादिङ । रसुवाको भोटेकोशी नदीमा आएको बाढीले बगाएर ल्याएको नगद राखिएको सेफ फेला पारी तोडफोड गरी पैसा चोरी गरेको आरोपमा धादिङ प्रहरीले २९ जनालाई नियन्त्रणमा लिएको छ ।
जिल्ला प्रहरी कार्यालय धादिङका अनुसार भदौ १० गते आएको बाढीले बगाएर ल्याएको सेफ गल्छी गाउँपालिका–४, बेल्खुखोलास्थित त्रिशूली नदी किनारमा फेला परेको थियो । स्थानीय व्यक्तिहरूले सेफ तोडफोड गरी त्यसमा रहेको यकिन नभएको नगद रकम आफूखुसी निकालेर लगेको भन्ने सूचना भदौ १२ गते प्राप्त भएपछि प्रहरीले तत्काल टोली परिचालन गरी अनुसन्धान थालेको थियो ।
प्रारम्भिक अनुसन्धानका क्रममा प्रहरीले २९ जनालाई नियन्त्रणमा लिएर खानतलासी गर्दा उनीहरूको साथबाट ९२ लाख ६८ हजार ५०५ रुपैयाँ नगद बरामद गरेको जनाएको छ ।
प्रहरीका अनुसार बरामद नगदको स्रोत तथा घटनामा संलग्न हुन सक्ने अन्य सम्भावित व्यक्तिहरूबारे थप अनुसन्धान भइरहेको छ । बरामद रकम र नियन्त्रणमा लिइएका व्यक्तिहरूमाथि आवश्यक अनुसन्धान तथा कानुनी प्रक्रिया अघि बढाइएको प्रहरीले जनाएको छ ।
नियन्त्रणमा लिइएकामध्ये अधिकांश गल्छी गाउँपालिका–४ मासटार तथा आदमघाट क्षेत्रका रहेका छन् । चितवन र पर्सा घर भएका केही व्यक्ति पनि घटनामा नियन्त्रणमा परेको जिल्ला प्रहरी कार्यालय धादिङका प्रवक्ता प्रहरी नायव उपरीक्षक प्रकाश दाहालले जानकारी दिए ।
उनका अनुसार पक्राउ पर्नेमा पर्साका बहुदरीमाई नगरपालिका ९ घर भई हाल जिल्ला धादिङ गजुरी गाउँपालिका ६ आदमघाट बस्ने बर्ष २८ को सकुर अन्सारी र चितवनकाे राप्ती नगरपालिका ६ घर भई हाल धादिङकाे गजुरी गाउँपालिका ८ आदमघाट बस्ने बर्ष २९ को विचारी आले मगर रहेका छन् ।
