वीरगंज । अग्रगामी मोर्चाको पर्सा जिल्ला स्तरीय सात दलीय बैठकले समावेशी सिद्धान्तका आधारमा २१ सदस्यीय जिल्ला स्तरीय मोर्चा गठन गर्ने निर्णय गरेको छ।
बहुजन एकता पार्टीका पर्सा जिल्ला इन्चार्ज सन्तोष रामको अध्यक्षतामा वीरगन्जमा सम्पन्न बैठकले मोर्चालाई थप व्यवस्थित, सशक्त र प्रभावकारी बनाउने निर्णय गरेको हो। बैठकमा मोर्चामा आबद्ध प्रत्येक दलबाट तीन–तीन जना सहभागी गराई २१ सदस्यीय जिल्ला स्तरीय समिति गठन गर्ने निर्णय गरिएको जनमत पार्टी पर्साका अध्यक्ष ओमप्रकाश सरार्फले जानकारी दिए।
बैठकले रसुवा, नुवाकोटलगायतका जिल्लामा बाढी तथा पहिरोका कारण भएको जनधनको क्षतिप्रति दुःख व्यक्त गर्दै पीडितको उद्धार, राहत तथा पुनःस्थापनाका लागि राज्यका सम्पूर्ण संयन्त्र परिचालन गर्न सरकारसँग माग गरेको छ।
यस्तै, आगामी असोज ३ गते वीरगन्जमा मोर्चाका केन्द्रीय नेतृत्वको विशेष उपस्थितिमा आयोजना हुने भेला तथा प्रशिक्षण कार्यक्रमलाई भव्य र प्रभावकारी रूपमा सम्पन्न गर्ने निर्णय पनि बैठकले गरेको छ।
बैठकमा प्रगतिशील लोकतान्त्रिक पार्टी (प्रलोपा)का मधेस प्रदेश अध्यक्ष अमिताभ बच्चन दास, जसपा पर्साका अध्यक्ष रामनरेश यादव, जनमत पार्टी पर्साका अध्यक्ष ओमप्रकाश सरार्फ, आम जनता पार्टीका जिल्ला अध्यक्ष विश्वराज पटेल, नेपाल संघीय समाजवादी पार्टीका इन्जिनियर रागीव हुसेन, प्रलोपा नेता बालकृष्ण श्रेष्ठ, जसपा उपाध्यक्ष श्रीराम गिरी, जनमत पार्टीका जिल्ला उपाध्यक्ष नागेन्द्र गुप्तालगायत नेताहरूको उपस्थिति थियो।
बैठकले अग्रगामी मोर्चालाई जिल्लामा थप सशक्त, समावेशी र जनमुखी बनाउँदै आगामी कार्यक्रमलाई प्रभावकारी रूपमा अघि बढाउने निर्णय गरेको सरार्फले बताए।
