जनकपुर । मुक्त हरवाचरवाको पहिचान, भूमि अधिकार तथा पुनर्स्थापनाको माग गर्दै जनकपुरधाममा हजारौँ मुक्त हरवाचरवाले विरोध प्रदर्शन गरेका छन्।
हरवाचरवा संघर्ष समितिको आयोजनामा ‘पहिचान हाम्रो आधार, पुनर्स्थापना हाम्रो सरोकार’ भन्ने मूल नारासहित मधेश प्रदेशका आठवटै जिल्लाबाट आएका मुक्त हरवाचरवाले जनकपुर रेलवे स्टेशनबाट विरोध र्याली निकालेका थिए। र्याली मुख्यमन्त्री तथा मन्त्रिपरिषद्को कार्यालय अगाडि पुगेर कोणसभामा परिणत भएको थियो।
कोणसभालाई सम्बोधन गर्दै हरवाचरवा संघर्ष समितिका संयोजक श्रीप्रसाद सदाले हरवाचरवा मुक्ति घोषणा भएको चार वर्षभन्दा बढी समय बितिसक्दा पनि समुदाय भूमि, सुरक्षित आवास, सामाजिक सुरक्षा, सम्मानजनक रोजगारी, जीविकोपार्जन तथा आर्थिक पुनर्स्थापनाजस्ता आधारभूत अधिकारबाट वञ्चित रहेको बताए।
मुक्त हरवाचरवा अधिकार मञ्चका केन्द्रीय महासचिव लागिन्द्र सदाले मुक्ति घोषणा मात्रले वास्तविक मुक्ति नहुने भन्दै पहिचान, अधिकारको सुनिश्चितता र दिगो पुनर्स्थापना आवश्यक रहेको बताए। मधेश प्रदेश सरकारले आर्थिक वर्ष २०८३/८४ को नीति तथा कार्यक्रममा हरवाचरवाको पूर्ण मुक्ति, भूमि अधिकार, सामाजिक सुरक्षा, आर्थिक पुनर्स्थापना तथा मर्यादित जीविकोपार्जन सुनिश्चित गर्ने प्रतिबद्धता जनाए पनि त्यसलाई स्पष्ट कार्ययोजना, पर्याप्त बजेट र समयसीमासहित कार्यान्वयन गर्नुपर्ने उनको भनाइ थियो।
हरवाचरवा पुनर्स्थापना आन्दोलनका सदस्य तथा अधिवक्ता वालाराम भट्टराईले मधेश प्रदेशका आठवटै जिल्लामा हरवाचरवाको लगत संकलन तथा प्रमाणीकरण गरी तत्काल परिचयपत्र वितरण गर्नुपर्ने माग गरे। भूमिहीन परिवारको पहिचान गरी दिगो पुनर्स्थापनाको स्पष्ट योजना लागू गर्न र त्यसका लागि आवश्यक बजेट सुनिश्चित गर्न पनि उनले सरकारसँग आग्रह गरे।
कोणसभामा मुक्त हरवाचरवा अधिकार मञ्चका केन्द्रीय अध्यक्ष दशनलाल मण्डल, कोषाध्यक्ष राजवती मण्डल, केन्द्रीय सदस्य शिव सदा, गीता सदाय, ठकनीदेवी महरा तथा जिल्ला हरवाचरवा अधिकार मञ्च पर्साका अध्यक्ष अमरदेव पासवानलगायतले सम्बोधन गरेका थिए।
वक्ताहरूले आफ्ना मागप्रति सरकारले तत्काल ध्यान नदिए मुख्यमन्त्री कार्यालय अगाडि अनिश्चितकालीन धर्ना सुरु गर्ने चेतावनी दिएका छन्।
हरवा–चरवा संघर्ष समितिले आफ्ना दीर्घकालीन माग सम्बोधन गर्न करिब १० दिनअघि मधेश प्रदेशका भूमि व्यवस्था, कृषि तथा सहकारी मन्त्रीसमक्ष अल्टिमेटमसहित ज्ञापनपत्र बुझाएको थियो। तर माग सम्बोधन नभएपछि विरोध प्रदर्शन गर्नुपरेको समितिले जनाएको छ।
प्रदर्शनका क्रममा आन्दोलनकारीले मुख्यमन्त्री तथा मन्त्रिपरिषद्को कार्यालय आसपासको निषेधित क्षेत्रमा र्याली अघि बढाउँदै सरकारको ध्यानाकर्षण गराएका थिए। उनीहरूले करिब ३० मिनेट सडक अवरोधसमेत गरेका थिए।
समितिले मुक्त हरवाचरवाका माग सम्बोधन गर्न मधेश प्रदेश सरकारले ठोस र अर्थपूर्ण कदम नचालेसम्म मुख्यमन्त्री कार्यालय अगाडि अनिश्चितकालीन धर्ना जारी राख्ने जनाएको छ। साथै, सम्बन्धित निकायलाई तत्काल संवादमा आउन र रचनात्मक तथा प्रभावकारी प्रक्रियामार्फत समस्या समाधान गर्न आग्रह गरेको छ।
