वीरगंज । नेपाली कांग्रेसको १५औँ महाधिवेशनबाट पर्साका चार जना नेता केन्द्रीय सदस्यमा निर्वाचित भएका छन् भने सहमहामन्त्री पदमा उम्मेदवारी दिएका पर्साकै नेता सुरेन्द्र प्रसाद चौधरी पराजित भएका छन् ।
केन्द्रीय सदस्यमा मधेसी खुलातर्फ पर्साका अनिल कुमार रुंगटा र अशर्फी साह निर्वाचित भएका छन् । सोही पदमा उम्मेदवारी दिएका पर्साका रामरुप प्रसाद कुर्मी भने पराजित भएका छन् । कुर्मी यसअघि विशेष महाधिवेशनबाट कांग्रेसको केन्द्रीय सदस्य बनेका थिए ।
यसैगरी, केन्द्रीय सदस्यको खस आर्य कोटाबाट नेपाली कांग्रेस पर्साका सभापति जनार्दन सिंह क्षेत्री निर्वाचित भएका छन् । मुस्लिम महिला कोटाबाट जमिला खातुन पनि केन्द्रीय सदस्यमा निर्वाचित भएकी छन् ।
यता, सहमहामन्त्री पदमा उम्मेदवारी दिएका पर्साका नेता सुरेन्द्र प्रसाद चौधरी भने पराजित भएका छन् । थारु कोटाबाट सहमहामन्त्री पदमा उम्मेदवारी दिएका चौधरी यसअघि विशेष महाधिवेशनबाट कांग्रेसको केन्द्रीय सदस्य बनेका थिए ।
सहमहामन्त्री मधेशी तर्फ पर्साकै नेता अजय चाैरसिया निर्वाचित भएका छन् । कांग्रेसका केन्द्रिय सदस्य एवं पूर्व मन्त्री समेत रहेका चाैरसिया सहमहामन्त्रीमा निर्वाचित भएका हुन् ।
यससँगै कांग्रेसको १५औँ महाधिवेशनबाट पर्साले एक पदाधिकारी सहित केन्द्रीय कार्यसमितिमा पांच जना प्रतिनिधि पाएको छ भने सहमहामन्त्री पदका उम्मेदवार चौधरी र केन्द्रीय सदस्यका उम्मेदवार कुर्मीले हार व्यहोरेका छन् ।
