वीरगञ्ज । वीरगञ्जको मुख्य सडक (मेनरोड) विस्तार तथा स्तरोन्नतिका लागि ठेक्का प्रक्रिया अघि बढेको छ। सडक डिभिजन कार्यालय हेटौँडाले मितेरी पुलदेखि गण्डक चोकसम्मको सडकलाई दुई खण्डमा विभाजन गरी निर्माणका लागि बोलपत्र आह्वान गरेको हो।
त्रिभुवन राजपथअन्तर्गत पर्ने उक्त सडकको पहिलो खण्डमा मितेरी पुलदेखि घण्टाघरसम्म र दोस्रो खण्डमा घण्टाघरदेखि गण्डक चोकसम्मको सडक समेटिएको छ। दुवै खण्डको लम्बाइ गरी कुल ८.०५४ किलोमिटर सडक स्तरोन्नति गरिनेछ।
पहिलो खण्डअन्तर्गत मितेरी पुलदेखि घण्टाघरसम्मको शून्यदेखि चार किलोमिटरसम्मको सडक निर्माण तथा स्तरोन्नति गरिनेछ। यसका लागि ठेक्का नम्बर TRP/RDHTD/33701130/083/84-26 निर्धारण गरिएको छ। उक्त खण्डको बोलपत्र जमानत रकम छ करोड रुपैयाँ र बोलपत्र दस्तुर २० हजार रुपैयाँ तोकिएको छ।
त्यसैगरी, दोस्रो खण्डमा घण्टाघरदेखि गण्डक चोकसम्मको चार किलोमिटरदेखि ८.०५४ किलोमिटरसम्मको सडक समेटिएको छ। यस खण्डका लागि ठेक्का नम्बर TRP/RDHTD/33701130/083/84-27 निर्धारण गरिएको छ। दोस्रो खण्डको बोलपत्र जमानत रकम पाँच करोड ५० लाख रुपैयाँ र बोलपत्र दस्तुर २० हजार रुपैयाँ तोकिएको छ।
दुवै खण्डको बोलपत्र जमानत रकम जोड्दा कुल ११ करोड ५० लाख रुपैयाँ पुग्छ। यद्यपि, सडक विस्तार तथा स्तरोन्नति आयोजनाको कुल अनुमानित लागत भने प्रकाशित सूचनामा खुलाइएको छैन।
सडक डिभिजन कार्यालय हेटौँडाका अनुसार इच्छुक तथा योग्य निर्माण व्यवसायीले २०८३ कात्तिक २० गते दिउँसो १२ बजेसम्म बोलपत्र पेस गर्न सक्नेछन्। सोही दिन दिउँसो १ बजे बोलपत्र खोलिनेछ। बोलपत्रपूर्व बैठक कात्तिक ९ गते बिहान ११ बजेका लागि निर्धारण गरिएको छ।
लामो समयदेखि चर्चामा रहेको वीरगञ्ज मेनरोड विस्तार तथा स्तरोन्नतिका लागि ठेक्का प्रक्रिया अघि बढेपछि सडक सुधारको कामले गति लिने अपेक्षा गरिएको छ।
वीरगञ्जको प्रमुख व्यापारिक तथा यातायात मार्गका रूपमा रहेको मेनरोड स्तरोन्नति भएपछि सवारी आवागमन सहज हुनुका साथै ट्राफिक व्यवस्थापनमा सुधार आउने अपेक्षा गरिएको छ। अब निर्माण व्यवसायी छनोट र ठेक्का सम्झौतापछि आयोजनाको निर्माण कार्य कहिले सुरु हुन्छ भन्ने विषयमा वीरगञ्जवासीको चासो बढेको छ।
