काठमाडौं । क्यानडामा बसेर नेपाली संगीतमा सक्रिय एनभी निर्वाण र कुशको नयाँ म्युजिक भिडियो ‘लाली’ सार्वजनिक भएको छ । ‘रियाज म्युजिक’को आधिकारिक युट्युब च्यानलमार्फत गीतको भिडियो सार्वजनिक गरिएको हो ।
यसअघि ‘चिसो चिसो पानी’ र ‘दिनँ’ जस्ता ट्र्याकमा सहकार्य गरिसकेका निर्वाण र कुशले यसपटक डान्स तथा पार्टी फ्लेभरको गीत ‘लाली’ ल्याएका हुन् । गीतमा प्रेम, युवापुस्ताको आकर्षण र नाइटलाइफलाई रोचक ढंगले प्रस्तुत गरिएको छ ।
क्याची कोरस र ऊर्जावान् बीट रहेको गीतमा निर्वाण र कुशकै शब्द, संगीत तथा स्वर रहेको छ । गायिका सेरेनले स्वरमा साथ दिएकी छन् भने गीतको संगीत संयोजन तथा बीट प्रोडक्सन Lay Zy ले गरेका छन् ।
‘निर्वाण रेकर्ड्स टोरोन्टो’मा तयार पारिएको गीतमा निर्वाणको मेलोडिक हिपहप र कुशको इनर्जेटिक र्याप शैलीको मिश्रण सुन्न सकिन्छ ।
हरि हुमागाईंको निर्देशनमा तयार पारिएको म्युजिक भिडियोमा जेस्टीको कोरियोग्राफी तथा मोडल इभा गिरीको अभिनय रहेको छ । भिडियोको डीओपी तथा भिजुअल सम्पादन निर्देशक हुमागाईंले गरेका हुन् भने उत्तम हुमागाईंले सिनेमाटोग्राफी सम्हालेका छन् । प्रबिन मानन्धरले भिडियोको कलरिङ तथा सम्पादन गरेका छन् ।
सात समुद्रपारि रहेर पनि नेपाली हिपहप संगीतमा सक्रिय निर्वाण र कुशको ‘लाली’लाई प्रवासबाट नेपाली संगीतमा गरिएको नयाँ प्रयोगका रूपमा हेरिएको छ । डिजिटल प्लेटफर्म तथा टिकटक–रिल्सलाई लक्षित गरी तयार पारिएको गीतले युवापुस्तामाझ लोकप्रियता हासिल गर्ने अपेक्षा गरिएको छ ।
