वीरगंज । जिल्ला प्रहरी कार्यालय पर्साले भारतको आईसीपी नाकाबाट नेपाल प्रवेश गरेको पेट्रोलियम पदार्थ बोकेको ट्याङ्करबाट अनाधिकृत रूपमा इन्धन चोरी गरी बिक्री–वितरण गर्ने कार्यमा संलग्न सात जनालाई ट्याङ्करसहित पक्राउ गरेको छ ।
प्रहरीका अनुसार बिहीबार साँझ करिब ५:१० बजे वीरगञ्ज महानगरपालिका–१४ बाइपास सडकस्थित सौदागर आयल सेन्टरमा ना.७ ख १५३९ नम्बरको पेट्रोलियम पदार्थ बोकेको ट्याङ्करबाट सिल गरिएको फलामको पाइपको हुक उचालेर अवैध रूपमा तेल निकालिरहेको अवस्थामा उनीहरूलाई रंगेहात नियन्त्रणमा लिइएको हो ।
पक्राउ पर्नेमा सौदागर आयल सेन्टरका सञ्चालक वीरगञ्ज–३ मालपोत चोक निवासी ५५ वर्षीय सुनैन मियाँ, पम्पमा लेखाको काम गर्ने वीरगञ्ज–१५ लक्ष्मणवा निवासी २३ वर्षीय असलम हवारी, पम्पका क्यासियर वीरगञ्ज–११ श्रीपुर निवासी २१ वर्षीय रफिक मियाँ रहेका छन् ।
त्यसैगरी, ना.७ ख २८०४ नम्बरको ट्याङ्करका चालक मकवानपुर हेटौडा–१० निवासी ४६ वर्षीय केशर राम सुनार र सहचालक हेटौडा–११ निवासी २० वर्षीय सन्देश राना मगर तथा ना.७ ख १५३९ नम्बरको ट्याङ्करका चालक हेटौडा–१४ निवासी ५० वर्षीय मन्द सिंह लामा र सहचालक २७ वर्षीय उमेश राना मगरलाई पनि प्रहरीले पक्राउ गरेको छ ।
घटनामा प्रयोग भएका ट्याङ्करहरू समेत प्रहरीले नियन्त्रणमा लिएको भने घटनाबारे थप अनुसन्धान भइरहेको नेपाल प्रहरीको केन्द्रीय कार्यालयले जनाएको छ ।
