वीरगंज । पर्सा प्रहरीले हवाई इन्धन चोरीमा संलग्न रहेको आरोपमा ७ जनालाई रंगेहात पक्राउ गरेको छ । प्रहरीले गैरकानुनी रूपमा ट्याङ्करबाट हवाई इन्धन निकाल्दै गरेको अवस्थामा उनीहरूलाई नियन्त्रणमा लिएको हो ।
जिल्ला प्रहरी कार्यालय पर्साका प्रहरी नायब उपरीक्षक (डीएसपी) चक्रबहादुर मल्लका अनुसार विशेष सूचनाका आधारमा वीरगंज महानगरपालिका–१४ स्थित सौदागर आयलमा छापा मारिएको थियो ।
छापाका क्रममा ना ७ ख १५३९ नम्बरको ट्याङ्करबाट हवाई इन्धन चोरी गरिरहेको अवस्थामा ७ जना व्यक्तिलाई रंगेहात पक्राउ गर्नुका साथै उक्त ट्याङ्करसमेत नियन्त्रणमा लिइएको डीएसपी मल्लले जानकारी दिए ।
प्रहरीले करिब तीन घण्टासम्म सञ्चालन गरेको विशेष अपरेसनको क्रममा इन्धन चोरीमा संलग्न रहेको आशंकामा उनीहरूलाई नियन्त्रणमा लिएको जनाएको छ । पक्राउ परेकाहरूमाथि आवश्यक अनुसन्धान भइरहेको प्रहरीले जनाएको छ ।
यसअघि पनि उनीहरूले हवाई इन्धन चोरीमा संलग्नता राखेका थिए वा थिएनन् भन्ने विषयमा अनुसन्धान भइरहेको जिल्ला प्रहरी कार्यालय पर्साले जनाएको छ । अनुसन्धान सम्पन्न भएपछि घटनासम्बन्धी विस्तृत विवरण सार्वजनिक गरिने प्रहरीले जनाएको छ ।
