वीरगंज । पर्साको पटेर्वा सुगौली गाउँपालिका–४ स्थित श्री नेपाल राष्ट्रिय माध्यमिक विद्यालय, पटेर्वामा निर्माण हुने ४ कोठे विद्यालय भवनको शिलान्यास गरिएको छ ।
दिव्य विकास स्रोत केन्द्र (डीडीआरसी) पर्सा र एक्शनएड नेपालको साझेदारी तथा पटेर्वा सुगौली गाउँपालिकाको समन्वयमा सञ्चालित स्थानीय अधिकार कार्यक्रमअन्तर्गत आइतबार आयोजित कार्यक्रममा गाउँपालिकाकी उपाध्यक्ष ममता महतो र वडा नं. ४ का वडा अध्यक्ष बासु पंजियारले संयुक्त रूपमा भवनको शिलान्यास गरेका हुन् ।
बालबालिकालाई सुरक्षित, बालमैत्री तथा गुणस्तरीय सिकाइ वातावरण उपलब्ध गराउने उद्देश्यले निर्माण हुन लागेको उक्त भवनका लागि एक्शनएड नेपालले आर्थिक सहयोग उपलब्ध गराएको हो । भवन निर्माण सम्पन्न भएपछि विद्यालयको भौतिक पूर्वाधार सुदृढ भई विद्यार्थीहरूको अध्ययन–अध्यापन थप प्रभावकारी हुने अपेक्षा गरिएको छ ।
शिलान्यास कार्यक्रममा गाउँपालिकाका अध्यक्ष दिनेश कुमार चौधरी, दिव्य विकास स्रोत केन्द्र पर्साका कार्यकारी निर्देशक रामाकान्त प्रसाद कुर्मी, विद्यालय व्यवस्थापन समितिका पदाधिकारी, भवन निर्माण उपभोक्ता समितिका प्रतिनिधि, स्थानीय अधिकार कार्यक्रममा कार्यरत कर्मचारी, महिला समूहका सदस्य, समाजसेवी तथा स्थानीय बासिन्दासहित करिब २५० जनाको सहभागिता रहेको थियो ।
कार्यक्रममा वक्ताहरूले गुणस्तरीय शिक्षाका लागि सुदृढ भौतिक पूर्वाधार अपरिहार्य रहेको उल्लेख गर्दै विद्यालय भवन निर्माणले बालबालिकालाई सुरक्षित र सहज सिकाइ वातावरण प्रदान गर्नुका साथै समग्र शैक्षिक गुणस्तर अभिवृद्धिमा महत्वपूर्ण योगदान पुग्ने विश्वास व्यक्त गरे ।
निर्माण हुन लागेको ४ कोठे विद्यालय भवनको कुल लागत रु. ६६ लाख ९३ हजार रहेको आयोजकले जनाएको छ ।
