वीरगंज । पर्सा प्रहरीले स्रोत नखुलेको प्रतिबन्धित भारतीय रुपैयाँसहित दुई जनालाई पक्राउ गरेको छ ।
जिल्ला प्रहरी कार्यालय पर्साका अनुसार आइतबार दिउँसो करिब ३:५० बजे इलाका प्रहरी कार्यालय जानकीटोलाबाट खटिएको प्रहरी टोलीले विशेष सूचनाका आधारमा जगरनाथपुर गाउँपालिका–२ स्थित नहर सडकखण्डमा ना.१० प ४४६९ नम्बरको मोटरसाइकल रोकी जाँच गरेको थियो ।
जाँचका क्रममा मोटरसाइकलमा सवार मकवानपुरको राक्सिराङ गाउँपालिका–२ घर भई हाल चितवनको माडी नगरपालिका–९ हनुमानझुलामा बस्दै आएका ४२ वर्षीय दिपेश हिमडुङ र २६ वर्षीय तिलक हिमडुङको साथबाट स्रोत नखुलेको प्रतिबन्धित भारतीय मुद्रा बरामद भएको प्रहरीले जनाएको छ ।
प्रहरीका अनुसार उनीहरूको साथबाट भारतीय ५०० दरका ३१६ थान (रु. १ लाख ५८ हजार), २०० दरका ७५ थान (रु. १५ हजार) र १०० दरका ३६५ थान (रु. ३६ हजार ५००) गरी जम्मा भारतीय रु. २ लाख ९ हजार ५०० बरामद गरिएको हो ।
बरामद गरिएको भारतीय मुद्रा तथा मोटरसाइकल नियन्त्रणमा लिई दुवै जनामाथि थप अनुसन्धान भइरहेको जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक चक्रबहादुर मल्लले जानकारी दिएका छन् ।
