वीरगंज । वीरगंजकाे रानीघाट चोकमा टायर बालेर प्रदर्शन गर्ने क्रममा शनिबार बिहान पक्राउ परेका हिन्दू सङ्गठनसँग आबद्ध चार जना युवा साँझ रिहा भएका छन्।
सुनसरी र सिरहामा प्रहरीको गोली लागेर तीन युवाको मृत्यु भएको घटनाको विरोधमा सडक अवरुद्ध गर्दै प्रदर्शन गरेको आरोपमा रानीघाट निवासी प्रदीप सर्राफ, विकास साहसहित चार जनालाई प्रहरीले नियन्त्रणमा लिएको थियो । त्यसलगतै हिन्दुवादी संगठनहरुले पक्राउ परेकाहरुलाई रिहा गर्न माग गरेका थिए । त्यसपछि उनीहरूलाई शनिबार साँझ रिहा गरिएको हो ।
स्थानीयवासीले रानीघाटस्थित सडकमा टायर बालेर प्रदर्शन गरिरहेका बेला प्रहरीले हस्तक्षेप गर्दै उनीहरूलाई नियन्त्रणमा लिएको थियो । पक्राउ परेका चारै जनालाई रिहापछि हिन्दू स्वयंसेवक संघका कृष्णा चौरसिया, ओमप्रकाश गुप्तालगायतका पदाधिकारीहरूले अविरको टीका लगाएर स्वागत गरेका थिए ।
जिल्ला प्रहरी कार्यालय पर्साका प्रहरी नायब उपरीक्षक (डीएसपी) राजु कार्कीको कमान्डमा वडा प्रहरी कार्यालय श्रीपुरका प्रहरी निरीक्षक नवीन थापा मगर र जिल्ला प्रहरी कार्यालय पर्साका प्रहरी निरीक्षक एकनाथ भट्टराईसहितको संयुक्त टोलीले प्रदर्शनस्थलबाट उनीहरूलाई पक्राउ गरेको थियो ।
प्रहरीले सार्वजनिक शान्ति तथा सामाजिक सद्भाव खलबल्याउने उद्देश्यले सडकमा टायर बालेर प्रदर्शन गरेको आरोपमा चार जनालाई नियन्त्रणमा लिएको जनाएको थियो । यद्यपि, पक्राउका बेला प्रहरीले उनीहरूको नाम सार्वजनिक गरेको थिएन ।
