वीरगञ्ज । राष्ट्रिय स्वतन्त्र पार्टी (रास्वपा) का नेता तथा बारा क्षेत्र नं. ४ का प्रतिनिधिसभा सदस्य रहबर अन्सारीले प्रतिनिधिसभामा दिएको अभिव्यक्तिलाई लिएर सामाजिक सञ्जालमा आलोचना भइरहेको छ ।
नेकपा (एमाले) बारा–काठमाडौं सम्पर्क मञ्चका अध्यक्ष प्रशान्त यादवले एक सार्वजनिक धारणा जारी गर्दै हिन्दू धर्मावलम्बीहरूको पवित्र धार्मिक उद्घोष ‘हर हर महादेव’ लाई लागुऔषध वा भाङ सेवनसँग जोडेर प्रस्तुत गरिएको भन्दै त्यसप्रति आपत्ति जनाएका छन् ।
यादवले यस्तो अभिव्यक्तिले करोडौँ हिन्दू श्रद्धालुको धार्मिक आस्था र भावनामा चोट पुगेको दाबी गरेका छन् । उनले लागुऔषध दुव्र्यसन गम्भीर सामाजिक समस्या भएकाले यसको नियन्त्रणका लागि तथ्य, प्रमाण र जिम्मेवार अभिव्यक्तिको आवश्यकता पर्ने उल्लेख गर्दै कुनै धर्म वा धार्मिक नारालाई त्यससँग जोडेर टिप्पणी गर्नु उचित नहुने बताएका छन् ।
प्रतिनिधिसभाको साउन १४ गते बसेको बैठकमा सांसद अन्सारीले धर्मसँग सम्बन्धित विषयमा दिएको अभिव्यक्ति सार्वजनिक भएपछि त्यसको पक्ष र विपक्षमा सामाजिक सञ्जालमा व्यापक प्रतिक्रिया आइरहेका छन् ।
यस विषयमा सांसद अन्सारीले थप स्पष्टीकरण दिएका छैनन् भने राष्ट्रिय स्वतन्त्र पार्टी (रास्वपा) ले पनि समाचार तयार पार्दासम्म कुनै आधिकारिक प्रतिक्रिया सार्वजनिक गरेको छैन ।
सामाजिक सञ्जालमा जारी बहसबीच विभिन्न राजनीतिक तथा सामाजिक व्यक्तित्वहरूले सार्वजनिक अभिव्यक्ति दिँदा धार्मिक संवेदनशीलतालाई ध्यानमा राख्नुपर्ने धारणा व्यक्त गरिरहेका छन् ।
