वीरगञ्ज । राष्ट्रिय स्वतन्त्र पार्टी (रास्वपा) का नेता योगेन्द्र चौरसियाले मधेशमा पछिल्ला दिनमा विकसित घटनाक्रमप्रति गहिरो चिन्ता व्यक्त गर्दै सम्पूर्ण नागरिकलाई शान्ति, सद्भाव र राष्ट्रिय एकताको पक्षमा दृढतापूर्वक उभिन आग्रह गरेका छन् ।
सार्वजनिक सन्देश जारी गर्दै नेता चौरसियाले मधेश विभिन्न भाषा, संस्कृति, धर्म र समुदायको अनुपम संगमस्थल भएको उल्लेख गरेका छन् । यही विविधताले नेपालको वास्तविक शक्ति र पहिचान झल्काउने भएकाले त्यसको संरक्षण सबैको साझा जिम्मेवारी भएको उनले बताएका छन् ।
पछिल्ला घटनाक्रमले समाजमा असहज अवस्था सिर्जना गरेको उल्लेख गर्दै उनले कुनै पनि प्रकारका अफवाह, घृणा वा उत्तेजना फैलाउने गतिविधिबाट टाढा रहन सबैसँग अपिल गरेका छन् । सामाजिक सञ्जाल वा अन्य माध्यमबाट द्वेष फैलाउने कार्यले सामाजिक सद्भावमा असर पुर्याउने भएकाले यस्ता गतिविधिमा संलग्न नहुन उनले आग्रह गरेका छन् ।
चौरसियाले कठिन परिस्थितिमा संयम, पारस्परिक सम्मान र सामाजिक सद्भाव नै सबैभन्दा ठूलो शक्ति भएको उल्लेख गर्दै विचारमा मतभेद हुन सक्ने भए पनि त्यसको समाधान संवाद, सहकार्य र कानुनी प्रक्रियाबाट मात्रै सम्भव हुने बताएका छन्। उनले सबै पक्षलाई जिम्मेवार र संयमित भूमिका निर्वाह गर्न आग्रह गरेका छन् ।
उनले शान्त, सुरक्षित र समृद्ध मधेश तथा समुन्नत नेपालको निर्माण सबैको साझा दायित्व भएको उल्लेख गर्दै विभाजन र द्वन्द्वभन्दा एकता, सहकार्य र आपसी विश्वासको मार्ग रोज्न सम्पूर्ण नागरिकलाई आग्रह गरेका छन् ।
