वीरगंज । नेकपा (एमाले) का नेता रुपेश पाण्डेले मधेशमा पछिल्ला दिनमा विकसित घटनाक्रमप्रति चिन्ता व्यक्त गर्दै सबैलाई शान्ति, सद्भाव र राष्ट्रिय एकता कायम राख्न अपिल गरेका छन् ।
सामाजिक सञ्जालमार्फत आफ्नो धारणा सार्वजनिक गर्दै पाण्डेले मधेश विविध भाषा, संस्कृति, धर्म र समुदायको साझा फूलबारी भएको उल्लेख गरेका छन् । पछिल्ला घटनाले सबैलाई दुःखी बनाएको भन्दै उनले यस्तो संवेदनशील समयमा कुनै पनि प्रकारको उत्तेजना, अफवाह वा द्वेष फैलाउने गतिविधिबाट टाढा रहन आग्रह गरेका छन् ।
उनले आपसी विश्वास, सामाजिक सद्भाव र राष्ट्रिय एकतालाई अझ सुदृढ बनाउन सबै पक्षले संयमता अपनाउनुपर्ने बताएका छन् । असहमति स्वाभाविक भए पनि त्यसको समाधान शान्तिपूर्ण संवाद र कानुनी प्रक्रियामार्फत मात्र सम्भव हुने उनको भनाइ छ ।
पर्सा क्षेत्र नं. ३ का प्रतिनिधि सभा सदस्यका प्रत्यासी समेत रहेका पाण्डेले मधेशलाई शान्त, सुरक्षित र समृद्ध बनाउने साझा अभियानमा सबैलाई एकजुट भएर अघि बढ्न आह्वान गर्दै आफ्नो सन्देशको अन्त्य “जय मधेश” भन्ने नारासहित गरेका छन् ।
