वीरगंज । जिल्ला प्रशासन कार्यालय पर्साले वीरगंज महानगरपालिकाको मुख्य क्षेत्रमा निषेधाज्ञा जारी गरेको छ । सुनसरी र सिरहामा भएका घटनाको विरोधमा वीरगंजमा पनि प्रदर्शन हुन सक्ने सुरक्षा निकायको आकलनपछि सार्वजनिक शान्ति, सुरक्षा र सुव्यवस्था कायम राख्ने उद्देश्यले निषेधाज्ञा जारी गरिएको हो ।
जिल्ला सुरक्षा समितिको निर्णयअनुसार प्रमुख जिल्ला अधिकारी भोला दाहालले स्थानीय प्रशासन ऐन, २०२८ को दफा ६ (३क) बमोजिम साउन १४ गते साँझ ५ः०० बजेदेखि साउन १५ गते बिहान ६ः०० बजेसम्म लागू हुने गरी निषेधाज्ञा आदेश जारी गरेका हुन् ।
प्रशासनका अनुसार निषेधाज्ञा वीरगंज महानगरपालिकाको पूर्वमा प्रतिमा चोक–बसपार्क बाइपास रोड, पश्चिममा तिलावे पुल, उत्तरमा गण्डक चोक र दक्षिणमा शंकराचार्य गेटसम्मको चार किल्लाभित्र लागू हुनेछ । उक्त अवधिभर तोकिएको क्षेत्रमा पाँच जनाभन्दा बढी व्यक्ति जम्मा हुन, कुनै पनि प्रकारका सभा, जुलुस, प्रदर्शन तथा अन्य सामूहिक गतिविधि गर्न नपाइने आदेशमा उल्लेख छ ।
प्रशासनले निषेधाज्ञाको उल्लंघन गर्ने व्यक्तिलाई नियन्त्रणमा लिएर प्रचलित कानूनबमोजिम कारबाही गरिने चेतावनी दिएको छ । जिल्ला प्रशासन कार्यालय पर्साले सम्भावित अप्रिय घटना रोक्न तथा सार्वजनिक शान्ति, सुरक्षा र सुव्यवस्था कायम राख्न निषेधाज्ञा जारी गरिएको जनाएको छ ।
