वीरगंज । नेपाली कांग्रेसका केन्द्रीय सदस्य तथा पूर्वमन्त्री रमेश रिजालले वर्तमान सरकार बहुमतको दम्भमा अहंकारी र अराजक बन्दै गएको आरोप लगाएका छन् । उनले सरकार जनताका आधारभूत समस्याप्रति संवेदनशील बन्न नसकेको भन्दै समयमै सचेत हुनुपर्ने बताएका छन् ।
पर्साको जगरनाथपुर गाउँपालिकाद्वारा ‘समृद्धिका लागि वन’ परियोजनाअन्तर्गत आयोजित वृक्षारोपण कार्यक्रमकाे उद्घाटन गर्दै पूर्वमन्त्री रिजालले सीमावर्ती क्षेत्रका स्थानीयले दैनिक विभिन्न समस्या झेलिरहेको र किसानहरू रासायनिक मलको अभावबाट पीडित भइरहेका बेला सरकार भने बहुमतको दम्भमा रमाइरहेको टिप्पणी गरे ।
उनले सरकारको वर्तमान कार्यशैलीले देशलाई गलत दिशातर्फ धकेलिरहेको दाबी गर्दै अराजकता र अहंकार नत्यागे मुलुक दुर्घटनातर्फ जान सक्ने चेतावनी दिए ।
रिजालले राष्ट्रिय स्वतन्त्र पार्टी (रास्वपा) लाई लक्षित गर्दै स्पष्ट एजेन्डा र कार्यक्रमबिनै सरकारमा सहभागी भएकाले वर्तमान सरकारबाट देशले अपेक्षित परिणाम पाउन नसक्ने दाबी गरे । “घण्टीको सरकारका कारण अबका दिन अझ चुनौतीपूर्ण हुन सक्छन् । त्यसैले सम्पूर्ण नेपाली नागरिक सचेत भएर अगाडि बढ्न आवश्यक छ,” उनले भने ।
पूर्वमन्त्री रिजालले विगतमा नेपाली कांग्रेसबाट पनि केही कमजोरी भएको स्वीकार गर्दै ती त्रुटिहरूलाई सच्याउँदै जनताको विश्वास जित्ने गरी अघि बढ्नुपर्नेमा जोड दिए ।
“विगतमा हामीबाट पनि केही कमी–कमजोरी भएका हुन सक्छन् । अब ती कमजोरी सच्याएर जनताको पक्षमा काम गर्दै अगाडि बढ्नुपर्छ,” उनले भने ।
जगरनाथपुर गाउँपालिका अध्यक्ष श्रीकान्त प्रसाद यादवकाे अध्यक्षतामा भएकाे कार्यक्रममा नेपाली कांग्रेस पर्साका सभापति एवं प्रदेशसभा सदस्य जनार्दन सिंह क्षेत्री, पूर्व प्रदेशसभा सदस्य प्रह्लाद गिरी, कांग्रेस मधेश प्रदेशका महामन्त्री बृहस्पति कृष्ण श्रेष्ठ, नेकपा (एमाले)का नेता वीरेन्द्र यादव, गाउँपालिकाकी उपाध्यक्ष बबीता सिंह क्षेत्री, प्रमुख प्रशासकीय अधिकृत सन्देश कुमार यादव, गादीमाई साझेदारी वन उपभोक्ता समूहका अध्यक्ष सहरुम राउत गद्दी तथा वडाध्यक्षहरू नेपाली कुशवाहा, सुभाष यादव, अयोध्या पटेललगायतको उपस्थिति रहेको थियो ।
