वीरगंज । नारायणी अस्पताल, वीरगंजमा उपचारका क्रममा बिरामीको मृत्यु भएपछि उत्पन्न विवाद र त्यसपछि चिकित्सकमाथि भएको कुटपिट तथा दुर्व्यवहारको घटनापछि जारी आन्दोलन अन्त्य गर्न सरकार र नेपाल चिकित्सक संघबीच पाँचबुँदे सहमति भएको छ । सहमतिसँगै नेपाल चिकित्सक संघले आजैदेखि आन्दोलन स्थगित गरी स्वास्थ्य सेवा नियमित सञ्चालन गर्ने छ ।
बुधबार स्वास्थ्य तथा खाद्य स्वच्छता मन्त्री निशा मेहताको उपस्थितिमा स्वास्थ्य तथा खाद्य स्वच्छता मन्त्रालय, गृह मन्त्रालय, कानुन, न्याय तथा संसदीय मामिला मन्त्रालय, उद्योग, वाणिज्य तथा आपूर्ति मन्त्रालय तथा नेपाल चिकित्सक संघका पदाधिकारीबीच बसेको बैठकले पाँचबुँदे निर्णय गरेको हो ।
सहमतिअनुसार नारायणी अस्पतालमा कार्यरत चिकित्सक तथा स्वास्थ्यकर्मीमाथि कुटपिट र दुर्व्यवहारमा संलग्न व्यक्तिहरूमाथि स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ बमोजिम थप कानुनी कारबाही अघि बढाइने भएको छ ।
यस्तै, स्वास्थ्य तथा खाद्य स्वच्छता मन्त्रालयले उक्त ऐनका दफा २, ३ र १५ तथा मुलुकी अपराध संहिता, २०७४ का दफा २३२ र २३३ संशोधनका लागि आगामी प्रतिनिधिसभा अधिवेशनमा विधेयक पेश गर्ने प्रक्रिया तत्काल अघि बढाउने सहमति भएको छ । यस कार्यमा कानुन, न्याय तथा संसदीय मामिला मन्त्रालयले आवश्यक सहजीकरण गर्नेछ ।
बैठकले उपभोक्ता संरक्षण ऐन, २०७५ अन्तर्गत स्वास्थ्यसम्बन्धी विषयमा आवश्यक संशोधनका लागि नेपाल चिकित्सक संघको सहभागितामा सात दिनभित्र कार्यदल गठन गर्ने निर्णय पनि गरेको छ । कार्यदलको प्रतिवेदनका आधारमा आवश्यक कानुनी संशोधन अघि बढाइने जनाइएको छ ।
यसअघि सरकार र नेपाल चिकित्सक संघबीच भएका विभिन्न सम्झौताहरू कार्यान्वयन गर्न स्वास्थ्य तथा खाद्य स्वच्छता मन्त्रालय, कानुन मन्त्रालय तथा चिकित्सक संघको सहभागितामा तीन दिनभित्र अर्को कार्यदल गठन गर्ने निर्णय पनि बैठकले गरेको छ ।
बैठकमा कानुन, न्याय तथा संसदीय मामिला मन्त्रालयका सचिव पाराश्वर ढुंगाना, उद्योग, वाणिज्य तथा आपूर्ति मन्त्रालयका सचिव नारायणप्रसाद शर्मा दुवाडी, स्वास्थ्य तथा खाद्य स्वच्छता मन्त्रालयका सचिव डा. विकास देवकोटा, मन्त्रीका प्रमुख विज्ञ सल्लाहकार डा. मनोहर प्रधान, गृह मन्त्रालयका सहसचिव कालीप्रसाद पराजुली तथा नेपाल चिकित्सक संघका अध्यक्ष डा. बद्री रिजाल, महासचिव डा. विश्वराज दवाडी र सह–कोषाध्यक्ष डा. तेजसु सिंह मल्ल सहभागी थिए ।
सहमतिसँगै नेपाल चिकित्सक संघले जारी आन्दोलन बुधबारदेखि नै स्थगित गर्दै देशभरका स्वास्थ्य संस्थामा सेवा सुचारु गर्ने छ ।
