वीरगंज । पर्साको जगरनाथपुर गाउँपालिकाले सार्वजनिक तथा ऐलानी पर्ती जग्गामा वृक्षारोपण अभियानलाई निरन्तरता दिएको छ । वन तथा वातावरण संरक्षणमा उत्कृष्ट काम गर्दै मधेश प्रदेशबाट संघीय सरकारको सम्मानसमेत प्राप्त गरिसकेको गाउँपालिकाले ‘समृद्धिका लागि वन’ परियोजनाअन्तर्गत थप क्षेत्रमा वृक्षारोपण गरेको हो ।
यसैक्रममा बुधबार गाउँपालिका वडा नम्बर ६ औराहास्थित ७ बिघा सार्वजनिक ऐलानी पर्ती जग्गामा एक हजार ५ सय बिरुवा रोपिएको छ । गाउँपालिकाका वन शाखा प्रमुख पप्पु यादवका अनुसार ‘समृद्धिका लागि वन’ परियोजनाअन्तर्गत उक्त क्षेत्रमा आँप, लिची, कटहर, जामुन, मेवा, मोहबनी, अम्बा, टीक र सिसौलगायतका विभिन्न प्रजातिका बिरुवा रोपिएको हो । वृक्षारोपण गरिएको क्षेत्रलाई तारबार गरी संरक्षणको व्यवस्था समेत गरिएको उनले बताए ।
गाउँपालिका अध्यक्ष श्रीकान्त प्रसाद यादवको अध्यक्षतामा आयोजित बृक्षाराेपण कार्यक्रमको उद्घाटन पूर्वमन्त्री तथा नेपाली कांग्रेसका केन्द्रीय सदस्य रमेश रिजालले गरेका थिए ।
कार्यक्रममा नेपाली कांग्रेस पर्साका सभापति एवं प्रदेशसभा सदस्य जनार्दन सिंह क्षेत्री, पूर्व प्रदेशसभा सदस्य प्रह्लाद गिरी, कांग्रेस मधेश प्रदेशका महामन्त्री बृहस्पति कृष्ण श्रेष्ठ, नेकपा (एमाले)का नेता वीरेन्द्र यादव, गाउँपालिकाकी उपाध्यक्ष बबीता सिंह क्षेत्री, प्रमुख प्रशासकीय अधिकृत सन्देश कुमार यादव, गादीमाई साझेदारी वन उपभोक्ता समूहका अध्यक्ष सहरुम राउत गद्दी तथा वडाध्यक्षहरू नेपाली कुशवाहा, सुभाष यादव, अयोध्या पटेललगायतको उपस्थिति रहेको थियो ।
गाउँपालिका अध्यक्ष यादवका अनुसार यसअघि पनि ‘समृद्धिका लागि वन’ परियोजनाअन्तर्गत वडा नम्बर ४ को सोहपुर–सोहरीस्थित ६ बिघा, वडा नम्बर १ को पिडारी गुठ्ठीस्थित ७ बिघा तथा वडा नम्बर २ को दसौतास्थित १२ र १५ बिघा ऐलानी जग्गामा वृक्षारोपण सम्पन्न भइसकेको छ ।
उनले अब वडा नम्बर २ कै लक्ष्मीपुरस्थित २० बिघा ऐलानी जग्गामा पनि एक साताभित्र वृक्षारोपण गरिने तयारी भइरहेको जानकारी दिए ।
अध्यक्ष यादवले ऐलानी तथा सार्वजनिक जग्गामा वृक्षारोपण गर्दा ती जग्गाको संरक्षण हुनुका साथै हरियाली प्रवर्द्धन, वातावरण संरक्षण र दीर्घकालीन रूपमा स्थानीय समृद्धिमा समेत योगदान पुग्ने विश्वास व्यक्त गरे ।
