वीरगंज । जिल्ला प्रहरी कार्यालय पर्साका प्रमुख प्रहरी उपरीक्षक (एसपी) सुदीपराज पाठकको सरुवा गरिएको छ । वीरगंजस्थित नारायणी अस्पतालमा भएको घटनापछि उत्पन्न विवादका बीच प्रहरी प्रधान कार्यालयले उनलाई प्रहरी प्रधान कार्यालय (हेडक्वार्टर) मा सरुवा गरेको हो।
उनको स्थानमा हाल काठमाडौं प्रहरी परिसरका प्रवक्ताको जिम्मेवारी सम्हालिरहेका प्रहरी उपरीक्षक (एसपी) पवन भट्टराईलाई पर्साको नयाँ प्रहरी प्रमुखका रूपमा खटाइएको छ ।
गत शनिबार नारायणी अस्पतालमा उपचारका क्रममा एक बिरामीको मृत्यु भएपछि आक्रोशित आफन्त तथा स्थानीयले अस्पतालमा तोडफोड गर्नुका साथै ड्युटीमा रहेका चिकित्सकमाथि कुटपिट गरेका थिए । उक्त घटनाको विरोधमा वीरगंजका सरकारी तथा निजी अस्पतालका चिकित्सकहरू गत आइतबारदेखि उपचार सेवा ठप्प पार्दै आन्दोलनमा उत्रिएका छन् ।
यही विषयमा गत सोमबार जिल्ला प्रशासन कार्यालय पर्सामा भएको वार्ताका क्रममा एसपी पाठकले आन्दोलनरत चिकित्सकहरूसँग दुर्व्यवहार गरेको भन्दै सामाजिक सञ्जालमा सार्वजनिक भएको भिडियो व्यापक रूपमा भाइरल बनेको थियो । उक्त घटनापछि उनको भूमिकामाथि प्रश्न उठ्दै आएको थियो ।
करिब १० महिनादेखि जिल्ला प्रहरी कार्यालय पर्साको नेतृत्व सम्हालिरहेका एसपी पाठक गत असोजको पहिलो साता पर्सामा सरुवा भएर आएका थिए । अहिले उनको काज सरुवासँगै एसपी पवन भट्टराईले पर्सा प्रहरीको नेतृत्व सम्हाल्ने भएका छन् ।
