वीरगंज । समावेशी तथा गुणस्तरीय शिक्षा सम्बन्धी समन्वय बैठक मंगलबार पर्साकाे पटेर्वा सुगौली गाउँपालिकामा सम्पन्न भएको छ । युरोपियन युनियनको आर्थिक सहयोग तथा People in Need, Accountability Lab Nepal, National Campaign for Education Nepal (NCE Nepal) र दिव्य विकास स्रोत केन्द्र, पर्साको संयुक्त साझेदारीमा सञ्चालित ‘पहुँच परियोजना’ अन्तर्गत बैठक सम्पन्न भएकाे हाे ।
बैठकका प्रमुख अतिथि पटेर्वा सुगाैली गाउँपालिकाका अध्यक्ष दिनेश कुमार चौधरीले समावेशी तथा गुणस्तरीय शिक्षा स्थानीय सरकारको प्रमुख प्राथमिकतामध्ये एक रहेको बताउँदै शिक्षा क्षेत्रको दिगो सुधारका लागि विकास साझेदार, नागरिक समाज र समुदायबीचको सहकार्यलाई थप प्रभावकारी बनाउन गाउँपालिका प्रतिबद्ध रहेको वताए ।
पटेर्वा सुगाैली गाउँपालिकाकी उपाध्यक्ष ममता महतोले प्रत्येक बालबालिकाले समान अवसरसहित गुणस्तरीय शिक्षा प्राप्त गर्ने वातावरण निर्माणका लागि स्थानीय तह, विद्यालय र समुदायबीच निरन्तर समन्वय र सहकार्य आवश्यक रहेको धारणा व्यक्त गरिन् ।
बैठकमा वडा अध्यक्षहरू, कार्यपालिका सदस्यहरू, गाउँपालिकाका विभिन्न शाखाका प्रमुखहरू, Accountability Lab Nepal, नेपाल अपाङ्ग महिला संघका प्रतिनिधिहरू तथा अन्य सरोकारवालाहरूको उल्लेखनीय सहभागिता रहेको थियो ।
कार्यक्रममा समावेशी तथा गुणस्तरीय शिक्षा प्रवर्द्धन, विद्यालय शासन सुधार, समुदायको सहभागिता अभिवृद्धि, बालबालिकाको सिकाइ उपलब्धि वृद्धि, उत्तरदायी शिक्षा प्रणाली निर्माण तथा स्थानीय सरकारको नेतृत्वमा शिक्षा क्षेत्रमा प्रभावकारी सहकार्य विस्तार गर्ने विषयमा विस्तृत छलफल भएको थियो ।
सहभागीहरूले स्थानीय तहमा शिक्षा क्षेत्रको योजना, कार्यान्वयन तथा अनुगमनलाई अझ प्रभावकारी बनाउने सम्बन्धमा महत्वपूर्ण सुझावसमेत प्रस्तुत गरेका थिए ।
कार्यक्रमको सहजीकरण दिव्य विकास स्रोत केन्द्र, पर्साका कार्यकारी निर्देशक रामाकान्त प्रसाद कुर्मीले गरेका थिए । उनले ‘पहुँच परियोजना’ले स्थानीय सरकार, विद्यालय, अभिभावक तथा नागरिक समाजबीचको साझेदारी सुदृढ गर्दै सबै बालबालिकाका लागि समावेशी, समान र गुणस्तरीय शिक्षा सुनिश्चित गर्न महत्वपूर्ण भूमिका खेलिरहेको बताए ।
कार्यक्रम सञ्चालन दिव्य विकास स्रोत केन्द्र, पर्साका सहायक कार्यक्रम अधिकृत नवलकिशोर साह रौनियारले गरेका थिए ।
