वीरगञ्ज । आम जनता पार्टी (आजपा) पर्सा जिल्ला कमिटीले नारायणी अस्पतालमा कार्यरत चिकित्सकमाथि भएको कुटपिट, आन्दोलनरत चिकित्सकमाथि प्रहरी प्रशासनबाट भएको दुव्र्यवहार तथा त्यसको प्रभावस्वरूप देशभरका सरकारी अस्पतालमा अत्यावश्यकबाहेकका स्वास्थ्य सेवा प्रभावित भएको घटनाप्रति गम्भीर ध्यानाकर्षण जनाएको छ।
आजपा पर्साका जिल्ला इन्चार्ज रञ्जु कुमारी साहले सोमबार जारी गरेको विज्ञप्तिमा उपचारमा संलग्न चिकित्सकमाथि भएको कुटपिट र त्यसको विरोधमा उत्रिएका चिकित्सकमाथि प्रहरी प्रशासनले गरेको दुव्र्यवहारको निन्दा गर्दै घटनापछि नारायणी अस्पतालका ६५ जना चिकित्सकले सामूहिक राजीनामा दिएको उल्लेख गरेकी छन्। यसका कारण काठमाडौंका वीर अस्पताल, कान्ति बाल अस्पताललगायत देशभरका सरकारी अस्पतालमा ओपिडीलगायत अत्यावश्यकबाहेकका स्वास्थ्य सेवा प्रभावित भएको विज्ञप्तिमा जनाइएको छ।
विज्ञप्तिमा सुनसरीको देवानगञ्ज–३ कप्तानगञ्जमा भएको विवादपछि सुरक्षा निकायले गरेको गोली प्रहारको घटनाबाट सुनसरी र मोरङ क्षेत्रमा तनाव कायम रहेकै बेला पर्सामा चिकित्सकमाथि भएको आक्रमणले अवस्था थप गम्भीर बनेको उल्लेख गरिएको छ।
इन्चार्ज साहले प्रमुख जिल्ला अधिकारीको उपस्थितिमा भइरहेको वार्ताकै क्रममा पर्साका प्रहरी उपरीक्षकबाट आन्दोलनरत चिकित्सकमाथि धक्कामुक्का तथा दुव्र्यवहार भएको आरोप लगाउँदै यस घटनापछि चिकित्सकहरू सामूहिक राजीनामा दिन बाध्य भएको दाबी गरेकी छन्। उनले सरकार र सुरक्षा निकायका पदाधिकारीलाई आम नागरिक तथा पेशाकर्मीप्रति सम्मानजनक व्यवहार गर्न आग्रह गरेकी छन्।
विज्ञप्तिमा पछिल्ला श्रृंखलाबद्ध घटनाले सरकार र सुरक्षा निकाय आम नागरिक तथा पेशाकर्मीप्रति असहिष्णु र आक्रामक बन्दै गएको टिप्पणी गर्दै सुनसरी र पर्सामा भएका घटनाको पूर्ण जिम्मेवारी सरकारले लिनुपर्ने माग गरिएको छ।
आजपाले घटनाको निष्पक्ष र सत्यतथ्य छानबिन गरी दोषीमाथि तत्काल कडा कारबाही गर्न, आम नागरिकको शान्ति सुरक्षाको प्रत्याभूति दिलाउन, स्वास्थ्यकर्मीहरूको पेशागत सुरक्षाको सुनिश्चितता गर्न तथा प्रभावित स्वास्थ्य सेवा तत्काल सुचारु गर्न सरकारसँग जोडदार माग गरेको छ।
