वीरगञ्ज । नेपाली कांग्रेसका युवा नेता कञ्चन झाले नारायणी अस्पतालमा उत्पन्न विवाद र त्यसपछि देशभर फैलिएको चिकित्सक आन्दोलनलाई पर्सा प्रहरी–प्रशासनको असफलताको परिणाम भएको बताएका छन् । उनले अस्पतालमा देखिएको तनावका कारण चार दिनदेखि बिरामीहरू उपचार सेवाबाट वञ्चित हुनु अत्यन्तै दुःखद रहेको उल्लेख गर्दै स्थानीय प्रशासनको कार्यशैलीप्रति गम्भीर असन्तुष्टि व्यक्त गरेका छन्।
झाले नारायणी अस्पतालमा कार्यरत अधिकांश चिकित्सकले असुरक्षाको महसुस गर्दै राजीनामा दिएको उल्लेख गर्दै अस्पतालमा भएको तोडफोड, चिकित्सकमाथि भएको कुटपिट तथा आन्दोलनरत चिकित्सकहरूमाथि प्रशासनले वार्ताका नाममा दबाब र धम्की दिएको आरोप लगाए। उनले यस्तो व्यवहारले समस्या समाधान हुनुको सट्टा आन्दोलन झन् चर्किएको दाबी गरे।
उनले संवेदनशील परिस्थितिमा प्रहरी–प्रशासनले संयमता अपनाई चिकित्सकलाई सुरक्षाको प्रत्याभूति दिलाएर सेवा सञ्चालनको वातावरण बनाउनुपर्नेमा “शासकीय दम्भ” प्रदर्शन गरेको आरोप लगाए। प्रशासनले जनताको विश्वास जित्ने गरी काम गर्नुपर्ने र बल प्रयोग तथा दबाबको मानसिकता त्याग्नुपर्ने उनको भनाइ छ।
झाले उपचारका क्रममा बिरामीको मृत्यु चिकित्सकीय लापरवाहीका कारण भएको हो वा होइन भन्ने विषय निष्पक्ष छानबिनबाट मात्र टुंगो लगाउनुपर्ने बताए। साथै अस्पतालमा तोडफोड गर्ने, चिकित्सकमाथि आक्रमण गर्ने तथा सुरक्षाको माग गर्ने चिकित्सकमाथि दुर्व्यवहार गर्ने जोसुकै भए पनि कानुनी दायरामा ल्याई कारबाही गर्नुपर्ने उनको माग छ।
पर्साका जिम्मेवार प्रशासकहरूले आफ्नो दायित्व प्रभावकारी रूपमा निर्वाह गर्न नसकेको आरोप लगाउँदै झाले उनीहरूमाथि आवश्यक कारबाही गर्न सरकारसँग माग गरेका छन्। चिकित्सक आन्दोलनको आवरणमा कसैले राजनीतिक स्वार्थ पूरा गर्न खोजेको पाइए त्यस्तामाथि पनि कानुनबमोजिम कारबाही हुनुपर्ने उनको भनाइ छ।
अन्त्यमा उनले सरकारले नारायणी अस्पतालको विवाद यथाशीघ्र समाधान गरी देशभरका अस्पतालमा नियमित स्वास्थ्य सेवा सञ्चालनको वातावरण बनाउनुपर्नेमा जोड दिएका छन्। साथै आन्दोलनरत चिकित्सकलाई बिरामीको संवेदनशीलतालाई मध्यनजर गर्दै सेवामा फर्किन, घाइते चिकित्सकको उचित उपचार गर्न तथा मृतकका परिवारलाई निष्पक्ष न्यायको प्रत्याभूति दिलाउन सरकारसँग आग्रह गरेका छन्।
