वीरगंज । पर्साकाे पर्सागढी नगरपालिका वडा नं. ६ का सर्वपक्षीय प्रतिनिधि, बुद्धिजीवी, समाजसेवी तथा स्थानीय नागरिकहरूले वडा कार्यालयबाट करिब तीन महिनादेखि नियमित सेवा प्रवाह हुन नसकेको भन्दै नगरपालिकालाई ७ दिने अल्टिमेटमसहित ज्ञापनपत्र बुझाएका छन् ।
यही श्रावण ६ गते चैनपुरमा सम्पन्न सर्वपक्षीय, बुद्धिजीवी तथा स्थानीय नागरिकहरूको वडा भेलाबाट सर्वसम्मत रूपमा पारित निर्णयअनुसार साेमबार नगर प्रमुख गाेकर्ण पाठकलाई ज्ञापनपत्र बुझाइएको हो ।
ज्ञापनपत्रमा नेपालको संविधानले प्रत्याभूत गरेको सम्मानपूर्वक बाँच्न पाउने हक, समानताको हक, स्वास्थ्य तथा आधारभूत सेवामा पहुँचको अधिकार तथा स्थानीय सरकार सञ्चालन ऐन, २०७४ र सुशासन (व्यवस्थापन तथा सञ्चालन) ऐन, २०६४ अनुसार वडा कार्यालयबाट नागरिकलाई नियमित, छिटो र प्रभावकारी सेवा उपलब्ध गराउनु स्थानीय तहको दायित्व रहेको उल्लेख गरिएको छ ।
तर वडा नं. ६ कार्यालयबाट विगत तीन महिनाभन्दा बढी समयदेखि सामाजिक सुरक्षा भत्ता, जन्म–मृत्यु, विवाह तथा बसाइँसराइ दर्ता, नागरिकता तथा व्यवसाय सिफारिस, विभिन्न प्रमाणपत्रलगायतका अत्यावश्यक प्रशासनिक सेवा नियमित रूपमा सञ्चालन हुन नसक्दा स्थानीयवासी ठूलो सास्ती खेप्न बाध्य भएको ज्ञापनपत्रमा उल्लेख छ । सेवा लिन पटक–पटक कार्यालय धाउनुपरेको, आर्थिक, सामाजिक तथा मानसिक भार बढेको भन्दै नागरिकहरूले गुनासो गरेका छन् ।
ज्ञापनपत्रमार्फत नागरिकहरूले वडा कार्यालयबाट प्रदान गरिने सम्पूर्ण सेवा तत्काल नियमित सञ्चालन गर्न, आवश्यक कर्मचारी तथा प्रशासनिक व्यवस्थापनको व्यवस्था गर्न, सेवा अवरुद्ध हुनुको कारण छानबिन गरी जिम्मेवार पक्षमाथि कानुनबमोजिम कारबाही गर्न, जनप्रतिनिधि र कर्मचारीबीच प्रभावकारी समन्वय कायम गर्न तथा नागरिक बडापत्रअनुसार समयमै सेवा प्रवाह सुनिश्चित गर्न माग गरेका छन् ।
उनीहरूले ज्ञापनपत्र प्राप्त भएको सात दिनभित्र सेवा नियमित गर्ने निर्णय र कार्यान्वयन प्रक्रिया अघि बढाउन नगरपालिकासँग माग गरेका छन् । अन्यथा नागरिकको संवैधानिक अधिकारको संरक्षणका लागि सम्बन्धित निकाय तथा अदालतसमक्ष कानुनी प्रक्रिया अपनाउनुका साथै योजनाबद्ध आन्दोलनका कार्यक्रम अघि बढाउन बाध्य हुने चेतावनी पनि दिएका छन् ।
नगर प्रमुखलाई ज्ञापनपत्र बुझाउने कार्यक्रममा पर्सागढी नगरपालिकाका पूर्व मेयर लोकनारायण यादव, प्रमुख प्रशासकीय अधिकृत राजु साह लगायत सर्वपक्षीय प्रतिनिधि, बुद्धिजीवी तथा स्थानीय नागरिकहरूको उल्लेखनीय उपस्थिति रहेको थियो ।
