वीरगंज । नारायणी अस्पतालको आकस्मिक कक्षमा उपचारका क्रममा बिरामीको मृत्यु भएपछि उत्पन्न विवाद, अस्पतालमा भएको तोडफोड तथा चिकित्सकमाथि भएको आक्रमणको घटनापछि वरिष्ठ चिकित्सक डा. निरज कुमार सिंहले आफू कुनै पनि छानबिन समितिमा सहभागी नहुने घोषणा गरेका छन् ।
डा. सिंहले आइतबार आफ्नो आधिकारिक फेसबुकमार्फत धारणा सार्वजनिक गर्दै शनिबार बसेको कुनै पनि बैठकमा आफू सहभागी नभएको र आफूलाई कुनै जानकारी तथा सहमति नलिई आफ्नो नाम समावेश गरेर छानबिन समिति गठन गरिएको बताएका छन् ।
उनले उक्त विषयमा पर्साका प्रमुख जिल्ला अधिकारी (सिडिओ) भाेला दाहाल तथा नारायणी अस्पतालका मेडिकल सुपरिटेन्डेन्ट डा. चितरन्जन साहलाई समेत जानकारी गराइसकेकाे वताएका छन् । आफ्नो सहमति र सहभागिताविना गठन गरिएको समितिमा आफू नबस्ने निर्णय गरेको उनले स्पष्ट पारेका छन् ।
डा. सिंहले घटनाको निष्पक्ष, पारदर्शी र विश्वसनीय छानबिनका लागि नेपाल मेडिकल काउन्सिलमार्फत अनुसन्धान गरिनुपर्ने धारणा राखेका छन् । चिकित्सकीय विषय भएकाले सम्बन्धित आधिकारिक निकायबाट अनुसन्धान हुँदा सत्यतथ्य बाहिर आउने विश्वास उनले व्यक्त गरेका छन् ।
उनले छानबिन समितिसँग सम्बन्धित कुनै पनि निर्णयमा आफ्नो हस्ताक्षर नरहेको र आफूले कुनै पनि निर्णयमा हस्ताक्षर नगरेको स्पष्ट पार्दै त्यससम्बन्धी भ्रमपूर्ण सूचना नफैलाउन सबैसँग आग्रह गरेका छन् ।
शनिबार नारायणी अस्पतालमा उपचारका क्रममा एक बिरामीको मृत्यु भएपछि आक्रोशित आफन्तले आकस्मिक कक्षमा तोडफोड गर्नुका साथै एक चिकित्सकमाथि आक्रमण गरेका थिए । उक्त घटनापछि चिकित्सक तथा स्वास्थ्यकर्मीहरूले दोषीमाथि कानुनी कारबाही, अस्पतालमा सुरक्षा व्यवस्था सुदृढ गर्न तथा सुरक्षित कार्य वातावरण सुनिश्चित गर्न माग गर्दै आन्दोलन जारी राखेका छन् ।
डा. सिंहले पनि घटनाको सत्यतथ्य स्थापित हुने गरी निष्पक्ष, पारदर्शी र कानुनी प्रक्रियाअनुसार अनुसन्धान हुनुपर्नेमा जोड दिँदै जुनसुकै आधिकारिक अनुसन्धान प्रक्रियामा आवश्यक सहयोग गर्न आफू तयार रहेको बताएका छन् ।
