वीरगंज । रोट्र्याक्ट क्लब अफ वीरगंज मेट्रोपोलिसले सामाजिक उत्तरदायित्वअन्तर्गत पर्साको श्री दलित प्राथमिक विद्यालय, महुवनलाई ७ थान पंखा सहयोग गरेको छ ।
विद्यालयमा गर्मीको समस्या तथा आधारभूत पूर्वाधारको अभावलाई ध्यानमा राख्दै विद्यार्थीहरूको अध्ययन वातावरण सहज बनाउने उद्देश्यले उक्त सहयोग गरिएको क्लबले जनाएको छ ।
सहयोग हस्तान्तरण कार्यक्रममा क्लबका रामबिनय यादव, आलोक यादव, आर्यन गुप्ता तथा मनीष सर्राफको सक्रिय सहभागिता रहेको थियो । उनीहरूले विद्यालयमा आवश्यक सामग्री उपलब्ध गराउँदै शैक्षिक वातावरण सुधारमा सबै पक्षको सहकार्य आवश्यक रहेको धारणा व्यक्त गरेका थिए ।
यस सहयोग कार्यक्रम सफल बनाउन आवश्यक पंखाहरू व्यवस्थापनमा विशेष सहयोग पुर्याउने प्रकाश कर्ण तथा अन्य सहयोगी दाताप्रति रोट्र्याक्ट क्लब अफ वीरगंज मेट्रोपोलिसले हार्दिक आभार व्यक्त गरेको छ ।
क्लबले आगामी दिनमा पनि शिक्षा, स्वास्थ्य तथा सामाजिक सेवासँग सम्बन्धित यस्ता जनहितका कार्यक्रमलाई निरन्तरता दिने प्रतिबद्धता जनाएको छ ।
