वीरगंज । वीरगंजस्थित नारायणी अस्पतालमा उपचारका क्रममा एक बिरामीको मृत्यु भएको घटनाको छानबिन गर्न समिति गठन गरिएको छ ।
वीरगञ्ज महानगरपालिका–२५ निवासी ४५ वर्षीय राजकुमार पटेलको शनिबार उपचारका क्रममा मृत्यु भएपछि चिकित्सक र अस्पताल प्रशासनको लापरबाही भएको आरोप लगाउँदै आफन्त तथा स्थानीयले विरोध प्रदर्शन गरेका थिए । त्यसपछि स्थानीय प्रशासनको समन्वयमा नारायणी अस्पतालका निमित्त मेडिकल सुपरिटेन्डेन्ट डा. चितरञ्जन साह, पीडित परिवार, आफन्त तथा जनप्रतिनिधिबीच भएको वार्तापछि छानबिन समिति गठन गर्ने सहमति भएको हो ।
जिल्ला प्रशासन कार्यालय पर्साका प्रशासकीय अधिकृतको नेतृत्वमा गठित समितिमा नारायणी अस्पतालका निमित्त मेडिकल सुपरिटेन्डेन्ट डा. चितरञ्जन साह र जिल्ला प्रहरी कार्यालय पर्साका प्रतिनिधि सदस्य रहेका छन् ।
जिल्ला प्रहरी कार्यालय पर्साका प्रवक्ता तथा सूचना अधिकारी डीएसपी चक्रबहादुर मल्लका अनुसार समितिले सात दिनभित्र प्रतिवेदन पेश गर्नेछ । प्रतिवेदनका आधारमा आवश्यक कारबाही प्रक्रिया अघि बढाइने सहमति भएको उनले जानकारी दिए ।
त्यस्तै, घटनाको समयमा आकस्मिक कक्षमा कार्यरत चिकित्सक तथा स्वास्थ्यकर्मीलाई तत्कालका लागि कामबाट रोक लगाउने तथा अस्पतालको सेवा–सुविधा सुधारका लागि आवश्यक कदम चाल्ने विषयमा पनि सहमति भएको डीएसपी मल्लले बताए ।
मृतकका आफन्तले अक्सिजनमा रहेका बिरामीलाई उपचारका लागि लैजाँदा अक्सिजन हटाएर लापरबाही गरिएको र त्यसकै कारण मृत्यु भएको आरोप लगाएका छन् ।
घटनापछि उपचारमा लापरबाही भएको भन्दै आक्रोशित आफन्त र स्थानीयले नारायणी अस्पतालको आकस्मिक कक्षमा प्रवेश गरी होहल्ला तथा तोडफोड गरेका थिए ।
सुरक्षाकर्मीले उनीहरूलाई बाहिर निकालेपछि पनि अस्पताल परिसरमा प्रदर्शन जारी रहेको थियो । स्थिति नियन्त्रणमा लिन प्रहरीले लाठीचार्ज समेत गरेको थियो । अस्पताल परिसर शनिबार दिनभरि तनावग्रस्त बनेको थियो ।
