वीरगंज । अन्तर्राष्ट्रिय श्रम संगठन (ILO) तथा राष्ट्रिय सहकारी महासंघको सहयोगमा जिल्ला सहकारी संघ, पर्साले सहकारी सदस्यहरूका लागि ‘थिंक.केयरकूप’ : स्याहार अर्थतन्त्रमा सहकारी व्यवसाय मोडेल’ सम्बन्धी एकदिने रोलआउट तालिम सञ्चालन गरेको छ ।
तालिमको मुख्य उद्देश्य स्याहार सहकारीको अवधारणा प्रवर्द्धन गर्दै स्याहारमा आधारित अर्थतन्त्रको विकास, लैङ्गिक समानता तथा सहकारी व्यवसाय मोडेलबारे सहभागीहरूको ज्ञान, सीप र क्षमता अभिवृद्धि गर्नु रहेको आयोजकले जनाएको छ । साथै सहकारीमार्फत स्याहार क्षेत्रलाई सम्मानित, व्यवस्थित र आर्थिक रूपमा दिगो बनाउने उपायबारे समेत सहभागीहरूलाई जानकारी गराइएको थियो ।
कार्यक्रममा जिल्ला सहकारी संघ, पर्साका कार्यकारिणी समिति, कर्मचारी तथा जिल्लाका १२ वटा सहकारी संस्थाका गरी २८ जना प्रतिनिधिको सहभागिता रहेको थियो ।
तालिमको उद्घाटन तथा समापन गर्दै जिल्ला सहकारी संघ, पर्साका अध्यक्ष हरिन्द्र सिंहले पर्सा जिल्लामा स्याहार सहकारी सञ्चालनको आवश्यकता औंल्याउँदै आगामी दिनमा जिल्ला सहकारी संघले यस अवधारणालाई व्यवहारमा उतार्ने गरी पहल गर्ने प्रतिबद्धता व्यक्त गरे ।
तालिममा मुख्य सहजकर्ताका रूपमा सुरज पण्डित र सहयोगी सहजकर्ताका रूपमा रामाकान्त चौधरीले सहजीकरण गरेका थिए । कार्यक्रममा स्याहार अर्थतन्त्रलाई सहकारी आन्दोलनसँग जोडेर सामाजिक तथा आर्थिक विकासमा योगदान पुर्याउने विषयमा विस्तृत छलफलसमेत गरिएको थियो ।
