वीरगंज । मुक्त हरवा–चरवा समुदायको कानुनी साक्षरता अभिवृद्धि गर्दै नागरिकता, भूमि अधिकार, सामाजिक सुरक्षा, श्रम अधिकार, निःशुल्क कानुनी सहायता, लैङ्गिक न्याय तथा जातीय विभेदविरुद्ध उपलब्ध कानुनी संरक्षणबारे व्यावहारिक ज्ञान र पहुँच विस्तार गर्ने उद्देश्यले राष्ट्रिय दलित नेटवर्क, नेपालको न्याय केन्द्र कार्यक्रमअन्तर्गत धनुषा जिल्लाको शहीदनगर नगरपालिका–५, सिमरापट्टी टोलमा कानुनी साक्षरता क्लिनिक सञ्चालन सुरु गरिएको छ ।
कार्यक्रमको उद्घाटन गर्दै शहीदनगर नगरपालिकाकी उपप्रमुख तथा न्यायिक समिति संयोजक सुनीता सिंहले कानुनी साक्षरता क्लिनिक मुक्त हरवा–चरवा समुदायका लागि समयसापेक्ष र अधिकारमुखी पहल भएको बताइन् । संविधानले प्रत्याभूत गरेका अधिकारको प्रभावकारी उपयोगका लागि कानुनबारे जानकारी अपरिहार्य रहेको उल्लेख गर्दै उनले अन्याय, विभेद, श्रम शोषण तथा लैङ्गिक हिंसाका पीडितलाई निष्पक्ष, सहज र पहुँचयोग्य न्याय उपलब्ध गराउन न्यायिक समिति प्रतिबद्ध रहेको बताइन् ।
राष्ट्रिय दलित नेटवर्क, नेपालका केन्द्रीय उपाध्यक्ष श्याम सुनारले मुक्त हरवा–चरवा समुदायको अधिकार, स्वतन्त्रता, पुनःस्थापना तथा न्यायमा पहुँच सुनिश्चित गर्न स्थानीय सरकारले कानुनी साक्षरता, सामुदायिक सशक्तीकरण, पैरवी तथा निःशुल्क कानुनी सहायता कार्यक्रमलाई प्राथमिकता दिनुपर्ने बताए । उनले समुदायलाई आफ्ना अधिकार प्रयोग गर्न सक्षम बनाउन यस्ता कार्यक्रमलाई निरन्तरता दिन आवश्यक रहेको धारणा राखे ।
कार्यक्रममा राष्ट्रिय दलित नेटवर्क, नेपालका हरवा–चरवा एक्टिभिस्ट राम दयाल माझीले शहीदनगर नगरपालिकाका सबै नौ वडामा प्रशिक्षित पैरालिगल र कानुनी अधिकृतमार्फत स्थायी तथा मोबाइल कानुनी सहायता क्लिनिक सञ्चालन गरिने जानकारी दिए । उनका अनुसार नागरिकता, भूमि अधिकार, सामाजिक सुरक्षा, श्रम अधिकार, लैङ्गिक न्याय तथा जातीय विभेदसम्बन्धी कानुनी व्यवस्थाबारे जानकारी दिनुका साथै आवश्यकताअनुसार व्यक्तिगत कानुनी परामर्श, उजुरी दर्ता, न्यायिक सेवामा पहुँचका लागि सहजीकरण तथा सम्बन्धित निकायसँग समन्वय गरिनेछ ।
कार्यक्रममा शहीदनगर नगरपालिकाका निमित्त प्रमुख प्रशासकीय अधिकृत अनिल कुमार झा, राष्ट्रिय दलित नेटवर्क, नेपालका केन्द्रीय कोषाध्यक्ष जंगबहादुर सुनार तथा कार्यकारी निर्देशक हुकुम सार्कीले कानुनी साक्षरताको आवश्यकता र समुदायमा यसको प्रभावबारे धारणा राखेका थिए ।
शहीदनगर नगरपालिका–५ का वडा अध्यक्ष सुरेश कापरको अध्यक्षतामा सम्पन्न कार्यक्रमको सञ्चालन राष्ट्रिय दलित नेटवर्क, नेपालका कानुनी अधिकृत सञ्जु पाण्डेले गरेकी थिइन् भने शहीदनगर नगरपालिका स्तरीय हरवा–चरवा पैरालिगल मञ्चकी अध्यक्ष मञ्जु महराले स्वागत मन्तव्य व्यक्त गरेकी थिइन् ।
