वीरगंज । नेपाल इन्जिनियर्स एसोसिएसन (एनईए) वीरगंज केन्द्रले ६४औँ इन्जिनियर्स दिवस विविध कार्यक्रमको आयोजना गरी मनाएको छ ।
केन्द्रले दुई दिनसम्म सञ्चालन गरेको कार्यक्रमअन्तर्गत आफ्नै भवन निर्माणको शुभारम्भ, वृक्षारोपण, प्राविधिक सेमिनार, मानसिक स्वास्थ्य सचेतना तथा इन्जिनियरहरूको भेटघाट कार्यक्रम सम्पन्न गरेको नेपाल इन्जिनियर्स एसोसिएसन वीरगंज केन्द्रका सभापति इन्जिनियर प्रियांसु रौनियारले जानकारी दिए ।
उनका अनुसार इन्जिनियर्स दिवसकै अवसरमा वीरगंज महानगरपालिका–२४ रामगढवामा निर्माण हुन लागेको एसोसिएसनको भवनको भूमिपूजन गरिएको थियो । साथै रामगढवा छठघाट परिसरमा वृक्षारोपण कार्यक्रमसमेत आयोजना गरिएको थियो ।
भवनको भूमिपूजन कार्यक्रम सभापति इन्जिनियर प्रियांसु रौनियारको अध्यक्षतामा सम्पन्न भएको थियो । कार्यक्रममा मधेश प्रदेशका भूमि व्यवस्था, कृषि तथा सहकारी मन्त्री श्याम पटेल प्रमुख अतिथिका रूपमा सहभागी भएका थिए ।
दिवसको अवसरमा इन्जिनियरहरूबीच भेटघाट तथा अनुभव आदानप्रदान कार्यक्रमका साथै प्राविधिक सेमिनार र मानसिक स्वास्थ्यसम्बन्धी सचेतना कार्यक्रम पनि सञ्चालन गरिएको एसोसिएसनले जनाएको छ ।
कार्यक्रममा इन्जिनियर अभि झा, इन्जिनियर कृष्णा कुशवाहा, इन्जिनियर दयानन्द साह, मणि झालगायत इन्जिनियर तथा विभिन्न क्षेत्रका व्यक्तिहरूको सहभागिता रहेको थियो ।
