वीरगंज । ६४औँ इन्जिनियर्स डेका अवसरमा नेपाल इन्जिनियर्स एशोसिएसन (एनईए) वीरगंज केन्द्रले मानसिक स्वास्थ्यसम्बन्धी सचेतना कार्यक्रम सम्पन्न गरेको छ।
वीरगंज–१४ स्थित बीआईटी इन्जिनियरिङ कलेजमा आयोजित कार्यक्रममा नेशनल मेडिकल कलेज, वीरगंजले क्लिनिकल सहयोग गरेको थियो । कार्यक्रमको अध्यक्षता नेपाल इन्जिनियर्स एशोसिएसन, वीरगंज केन्द्रका अध्यक्ष इन्जिनियर प्रियांशु कुमार गुप्ताले गरेका थिए ।
एशोसिएसनका कोषाध्यक्ष इन्जिनियर इकबाल हुसेनको समन्वयमा सम्पन्न कार्यक्रममा इन्जिनियरिङ अध्ययनरत विद्यार्थी, प्राध्यापक, पेशाकर्मी तथा एशोसिएसनका सदस्यहरूको उल्लेखनीय सहभागिता रहेको थियो ।
कार्यक्रममा नेशनल मेडिकल कलेजका क्लिनिकल साइकोलोजिस्ट सन्देश सावन्तले मानसिक स्वास्थ्यको महत्व, तनाव व्यवस्थापन, भावनात्मक सन्तुलन, कार्य–जीवन सन्तुलन, मानसिक लचकता तथा आवश्यकता पर्दा समयमै मनोवैज्ञानिक परामर्श लिनुपर्ने विषयमा प्रस्तुति दिएका थिए । उनले मानसिक स्वास्थ्यप्रति सचेत रहनु व्यक्तिगत तथा व्यावसायिक दुवै जीवनका लागि अत्यन्त आवश्यक रहेको बताए ।
सहजीकरणपछि सहभागीहरूसँग अन्तरक्रियात्मक छलफलसमेत गरिएको थियो । सहभागीहरूले मानसिक स्वास्थ्यसँग सम्बन्धित विभिन्न जिज्ञासा राख्दै आफ्नो दैनिक जीवन र पेशागत क्षेत्रमा मानसिक स्वास्थ्य व्यवस्थापनका उपायबारे जानकारी लिएका थिए ।
नेशनल मेडिकल कलेजले यस्ता स्वास्थ्य प्रवर्द्धन तथा समुदायमुखी कार्यक्रममार्फत मानसिक स्वास्थ्यसम्बन्धी जनचेतना अभिवृद्धि गर्दै आफ्नो सामाजिक उत्तरदायित्वलाई निरन्तरता दिँदै आएको जनाएको छ ।
