वीरगंज । वीरगंज महानगरपालिका वडा नं. २३ सबैठवामा विगत चार वर्षदेखि विवादका कारण अवरुद्ध रहेको नाला (ढल निकास) कार्यवाहक नगरप्रमुख इम्तियाज आलमको सक्रिय पहलमा खुलाइएको छ । लामो समयदेखि पानी निकास अवरुद्ध हुँदा वर्षायाममा बस्ती जलमग्न हुने र स्थानीयले सास्ती भोग्दै आएका थिए ।
स्थानीय बासिन्दाले पानी निकासका लागि प्रयोग गरिएको होम पाइप जाम भई विवाद सिर्जना भएको भन्दै कार्यवाहक नगरप्रमुख आलमसमक्ष नाला खुलाइदिन निवेदन दिएका थिए । जनगुनासो प्राप्त हुनासाथ नगरप्रमुख आलमले महानगरपालिकाको सरसफाइ शाखाका प्रमुख सरफोदिन मियाँलाई तत्काल समस्या समाधान गर्न निर्देशन दिएका थिए ।
निर्देशन प्राप्त भएपछि सरसफाइ शाखाका प्रमुख मियाँ नगर प्रहरीको टोलीसहित घटनास्थल पुगेका थिए । जेसिबी (JCB) र स्विपरको प्रयोग गरी बन्द रहेको होम पाइप तत्काल खुलाइएको महानगरपालिकाले जनाएको छ ।
चार वर्षदेखि समाधान हुन नसकेको समस्या कार्यवाहक नगरप्रमुख आलमको पहलमा दुई दिनभित्रै समाधान भएपछि स्थानीय बासिन्दाले खुशी व्यक्त गरेका छन् । नाला खुलेसँगै वर्षाको पानी सहज रूपमा निकास हुन थालेको र अब सामान्य वर्षामा समेत बस्ती डुबानमा पर्ने समस्या हट्ने अपेक्षा गरिएको छ ।
स्थानीयवासीले कार्यवाहक नगरप्रमुख आलमको पहलको प्रशंसा गर्दै नेतृत्वमा इच्छाशक्ति भए जटिल देखिने समस्या पनि छोटो समयमै समाधान गर्न सकिने उदाहरण प्रस्तुत भएको बताएका छन् ।
एक स्थानीयले भने, “यदि नेतृत्वले साँच्चिकै चाहेको भए चार वर्षअघि नै यो विवाद समाधान हुन सक्थ्यो । इच्छाशक्ति भए काम गर्न समय लाग्दैन भन्ने कुरा कार्यवाहक नगरप्रमुखले दुई दिनमै प्रमाणित गर्नुभएको छ ।”
स्थानीयका अनुसार यसअघि पानी निकास बन्द हुँदा सामान्य वर्षामै सडक र बस्ती जलमग्न हुने तथा आवतजावतमा कठिनाइ हुने गरेको थियो । अहिले नाला सफा भई पानीको निकास सहज बनेपछि वर्षायाममा हुने समस्या दीर्घकालीन रूपमा समाधान हुने विश्वास स्थानीयले व्यक्त गरेका छन् ।
