वीरगंज । श्री गहवामाई तीर्थ क्षेत्र विकास समितिले आफ्नो सामाजिक उत्तरदायित्वअन्तर्गत मानवसेवा आश्रमलाई विभिन्न खाद्यान्न तथा दैनिक उपभोग्य सामग्री सहयोग प्रदान गरेको छ ।
समितिका सचिव लक्ष्मीनारायण गुप्ता (पप्पु गुप्ता)का अनुसार आश्रममा आश्रित ज्येष्ठ नागरिक तथा असहाय व्यक्तिहरूको दैनिक जीवन सहज बनाउन पिठो, तेल, नुन, तरकारीलगायत आवश्यक खाद्यान्न सामग्री हस्तान्तरण गरिएको हो ।
सहयोग ग्रहण गर्दै मानवसेवा आश्रमले समितिप्रति आभार व्यक्त गरेको छ । आश्रमले उक्त सहयोगले आश्रित ज्येष्ठ नागरिक तथा असहाय व्यक्तिहरूको सेवा, संरक्षण र दैनिक व्यवस्थापनमा महत्वपूर्ण टेवा पुगेको जनाएको छ ।
आश्रमका प्रतिनिधिहरूले समाजसेवाप्रतिको यस्तो संवेदनशीलता, उदारता र मानवीय भावनाले अन्य व्यक्ति तथा संघसंस्थालाई समेत सामाजिक सेवामा प्रेरित गर्ने विश्वास व्यक्त गरेका छन् ।
धार्मिक गतिविधिसँगै सामाजिक उत्तरदायित्वका कार्यक्रमलाई पनि प्राथमिकतामा राख्दै आएको श्री गहवामाई तीर्थ क्षेत्र विकास समितिले आगामी दिनमा पनि यस्ता मानवीय तथा सामाजिक सेवामूलक कार्यक्रमलाई निरन्तरता दिने प्रतिबद्धता जनाएको छ ।
मानवसेवा आश्रमले समितिको उत्तरोत्तर प्रगति, सफलता तथा श्री गहवामाईको असीम कृपा सधैं रहिरहोस् भन्ने शुभकामनासमेत व्यक्त गरेको छ ।
