वीरगंज । वीरगंजकाे विद्युत आपूर्तिको प्रमुख विकल्पका रूपमा रहेको छपकैया ३३ केभी अन्डरग्राउन्ड केबलमा आएको प्राविधिक खराबी (फल्ट) तीन दिन र तीन रातको निरन्तर प्रयासपछि पत्ता लागेको छ । नेपाल विद्युत प्राधिकरण, वीरगंज वितरण केन्द्रले केबलको समस्या समाधानतर्फ काम अन्तिम चरणमा पुगेको जनाएको छ ।
प्राधिकरणका अनुसार केबलमा समस्या देखिनेबित्तिकै उच्च व्यवस्थापनको समन्वयमा Fault Locator Megger Testing Van रातारात वीरगंज ल्याएर परीक्षण सुरु गरिएको थियो । तर रातभरको प्रयासपछि पनि प्रारम्भिक रूपमा फल्टको स्थान पहिचान हुन नसक्दा छपकैया सबस्टेसनअन्तर्गत सञ्चालित अस्पताल, विर्तामाई, नगवा, छपकैया र बलिरामपुर फिडरमध्ये बलिरामपुर, छपकैया र नगवा फिडरको विद्युत आपूर्ति अवरुद्ध भएको थियो ।
विद्युत सेवा लामो समय अवरुद्ध नहोस् भन्ने उद्देश्यले प्राधिकरणले अर्को दिनदेखि नै प्रभावित सबै फिडरमा वैकल्पिक विद्युत आपूर्तिको व्यवस्था मिलाएको जनाएको छ ।
लगातार तीन दिन र तीन रातको प्राविधिक खोजीपछि नगवा पोखरी नजिक अन्डरग्राउन्ड केबलमा आएको खराबीको स्थान पहिचान गरिएको हो । उक्त क्षेत्रमा निर्माणाधीन पसौंनी–छपकैया ३३ केभी ओभरहेड लाइन सम्पन्न भइसकेकाले पुरानो लाइन नकटाई नै मर्मत कार्य अघि बढाउन सहज भएको प्राधिकरणले जनाएको छ ।
प्राधिकरणका अनुसार प्रतिकूल वर्षायाम, केही स्थानीयको अवरोध तथा चुनौतीपूर्ण अवस्थाका बीच पनि वीरगंज वितरण केन्द्रका कर्मचारी, प्राविधिक टोली र निर्माण व्यवसायीले दिनरात खटेर निर्माणाधीन पसौंनी–छपकैया ३३ केभी ओभरहेड लाइन दुई दिनमै सम्पन्न गरी सफलतापूर्वक चार्ज गरेका छन् ।
वीरगंज वितरण केन्द्रले कठिन परिस्थितिमा धैर्यपूर्वक सहयोग गर्ने स्थानीय उपभोक्ता, स्थानीय प्रशासन, सञ्चारकर्मी, निर्माण व्यवसायी तथा प्राधिकरणको उच्च व्यवस्थापनप्रति आभार व्यक्त गरेको छ ।
प्राधिकरणले नयाँ ३३ केभी ओभरहेड लाइन सञ्चालनमा आएसँगै भविष्यमा वीरगंजवासीले अझ भरपर्दो, गुणस्तरीय र नियमित विद्युत सेवा प्राप्त गर्ने विश्वास व्यक्त गर्दै यसलाई वीरगंजकाे विद्युत आपूर्ति प्रणालीका लागि महत्त्वपूर्ण उपलब्धि तथा नयाँ कोसेढुंगा भएको जनाएको छ ।
