वीरगंज । पर्साको कालिकामाई गाउँपालिकामा कर्मचारीमाथि भएको कुटपिट तथा दुर्व्यवहारको घटनाको निष्पक्ष छानबिन गरी दोषीमाथि कानुनी कारबाही गर्न स्थानीय राजेश प्रसाद कुर्मीले माग गरेका छन् ।
शनिबार प्रेस विज्ञप्ति जारी गर्दै कुर्मीले मिति २०८३ असार २३ गते कालिकामाई गाउँपालिका कार्यालयमा भएको घटनाप्रति आफ्नो गम्भीर ध्यानाकर्षण भएको जनाएका छन्। उनले कालिकामाई गाउँपालिका–३ का वडाध्यक्ष संजय कुमार पटेलको नेतृत्वमा कर्मचारीमाथि भएको भनिएको कुटपिट तथा दुर्व्यवहारको घटना दुःखद, निन्दनीय तथा कानुनी राज्यको मर्मविपरीत रहेको बताएका छन् ।
विज्ञप्तिमा लोकतान्त्रिक शासन व्यवस्थामा जनप्रतिनिधिसमेत सबैले कानुनको दायराभित्र रहेर आफ्नो असन्तुष्टि र अधिकारको प्रयोग गर्नुपर्ने उल्लेख गर्दै हिंसात्मक व्यवहार कुनै पनि दृष्टिकोणले स्वीकार्य हुन नसक्ने धारणा व्यक्त गरिएको छ । दोस्रो कार्यकालका लागि निर्वाचित जनप्रतिनिधिबाट यस्तो गतिविधि हुनु जनप्रतिनिधिको मर्यादा र जिम्मेवारीसँग मेल नखाने पनि विज्ञप्तिमा उल्लेख छ ।
कुर्मीले घटनाको वास्तविक कारण, पृष्ठभूमि र उद्देश्यबारे निष्पक्ष छानबिन गरी सत्यतथ्य सार्वजनिक गर्नुपर्नेमा जोड दिएका छन् । प्राप्त जानकारीअनुसार कार्यादेशबिना सम्पन्न गरिएको भनिएको कामको भुक्तानीसँग सम्बन्धित विवादका कारण उक्त घटना भएको चर्चा रहेको उल्लेख गर्दै त्यस विषयमा पनि सत्यतथ्य बाहिर ल्याउन सम्बन्धित निकायसँग आग्रह गरेका छन् ।
विज्ञप्तिमा वडाध्यक्ष पटेलले आफ्नो लामो कार्यकालमा वडा नं. ३ मा भएका विकास निर्माण, शिक्षा, स्वास्थ्य, सडक, खानेपानी तथा अन्य आधारभूत सेवाको अवस्थाबारे वडा तथा गाउँपालिकावासीलाई स्पष्ट जानकारी गराउनुपर्ने धारणा पनि राखिएको छ । गाउँपालिका कार्यालय रहेको वडामै अपेक्षाअनुसार शिक्षा, स्वास्थ्य र पूर्वाधार विकास हुन नसकेको विषयमा समीक्षा आवश्यक रहेको उनले बताएका छन् ।
त्यसैगरी, हालै सार्वजनिक भएको एक भिडियोमा करार नियुक्ति तथा तथाकथित “बाउन्सर” भर्नासम्बन्धी उठाइएका विषयमा पनि आफ्नो कार्यकालमा भएका नियुक्ति प्रक्रियाबारे तथ्य सार्वजनिक गर्न सम्बन्धित पक्षलाई उनले आग्रह गरेका छन् ।
नेपालमा विधिको शासन, सुशासन र पारदर्शितालाई संस्थागत गर्ने प्रयास भइरहेका बेला कुनै पनि व्यक्तिले कर्मचारीलाई दबाब, धम्की वा बल प्रयोग गरेर गैरकानुनी काम गराउने वा गराउन खोज्ने प्रवृत्ति स्वीकार्य नहुने उल्लेख गर्दै उनले सबै पक्षलाई कानुनको सर्वोच्चता र लोकतान्त्रिक मूल्य–मान्यताको सम्मान गर्न आग्रह गरेका छन् ।
विज्ञप्तिको अन्त्यमा कुर्मीले कर्मचारीमाथि भएको भनिएको कुटपिट तथा दुर्व्यवहारको घटनाको निष्पक्ष, स्वतन्त्र र प्रभावकारी छानबिन गरी दोषी जोसुकै भए पनि कानुनबमोजिम कारबाही गर्न सम्बन्धित निकायसँग माग गरेका छन् ।
