वीरगंज । मनसुन सक्रिय भएसँगै आउन सक्ने सम्भावित प्राकृतिक विपद् तथा त्यसबाट हुन सक्ने क्षति न्यूनीकरणका लागि वीरगंज महानगरपालिकाले पूर्वतयारीलाई तीव्र बनाएको छ । यसैक्रममा कार्यवाहक नगरप्रमुख इम्तियाज आलमको अध्यक्षतामा शनिबार नगर विपद् व्यवस्थापन मूल समितिको आकस्मिक बैठक सम्पन्न भएको छ ।
कार्यवाहक नगरप्रमुखको सचिवालयमा बसेको बैठकले मनसुन पूर्वतयारी, स्थलगत अनुगमन, स्वास्थ्य सेवा व्यवस्थापन तथा वडा कार्यालयहरूलाई उच्च सतर्कतामा राख्ने विषयमा विस्तृत छलफल गर्दै महत्वपूर्ण निर्णयहरू गरेको हो ।
बैठकले मनसुन सुरु भइसकेकाले सम्भावित जोखिम न्यूनीकरणका लागि आवश्यक स्रोत–साधन, जनशक्ति र पूर्वतयारीलाई चुस्त बनाउने निर्णय गरेको छ । साथै, मौसम पूर्वानुमान तथा पूर्वसूचना प्रणालीसँग निरन्तर समन्वय गर्दै आवश्यक तयारीलाई प्रभावकारी बनाइने निर्णय गरिएको छ ।
महानगर क्षेत्रका केही स्थानमा मनसुनका कारण समस्या देखिन थालेपछि तत्काल अनुगमन टोली परिचालन गर्ने निर्णय पनि बैठकले गरेको छ । टोलीले प्रभावित क्षेत्रको स्थलगत निरीक्षण गरी समस्या समाधानका लागि आवश्यक पहल गर्ने, सम्भावित जोखिमको मूल्याङ्कन गर्ने तथा राहत वितरणको पूर्वतयारीसमेत गर्नेछ ।
विपद्को समयमा स्वास्थ्य क्षेत्रमा आउन सक्ने चुनौतीलाई ध्यानमा राख्दै आवश्यक औषधि, स्वास्थ्य सामग्री तथा स्वास्थ्य सेवाको भरपर्दो व्यवस्था गर्ने निर्णय गरिएको छ । सम्भावित महामारी वा अन्य स्वास्थ्य समस्यालाई मध्यनजर गर्दै सम्पूर्ण स्वास्थ्यकर्मीलाई तयारी अवस्थामा राख्ने तथा आवश्यक समन्वयका लागि सम्बन्धित निकायमा पत्राचार गरिने भएको छ ।
यसैगरी, महानगरका सबै वडा कार्यालयलाई सम्भावित विपद्को जोखिमको पूर्वविश्लेषण गर्दै आवश्यक उद्धार तथा राहत तयारीसहित उच्च सतर्कतामा रहन निर्देशन दिने निर्णय पनि बैठकले गरेको छ ।
बैठकमा प्रमुख प्रशासकीय अधिकृत वसन्तबहादुर बोहरा, अवधेश प्रसाद कुशवाहा, हरिशंकर प्रसाद कुर्मी, राकेश साह, विभा मिश्रा, सफुदिन मियाँ, हरिप्रसाद भुसाल तथा वीरगंज महानगरपालिका स्वास्थ्य शाखाका प्रमुख राजु प्रसाद साहलगायतको उपस्थिति रहेको थियो ।
वीरगंज महानगरपालिकाले मनसुनजन्य विपद्बाट हुन सक्ने सम्भावित क्षति न्यूनीकरण गर्दै नगरवासीको सुरक्षा सुनिश्चित गर्न सम्पूर्ण संयन्त्रलाई तयारी अवस्थामा राखिएको जनाएको छ ।
