वीरगंज । साउन महिनाको पहिलो दिनको अवसर पारेर वीरगंज महानगरपालिका–१० अशोकबाटिकास्थित रोयल किड्स मन्टेश्वरी स्कुलले विद्यार्थीहरूबीच मेहन्दी प्रतियोगिता सम्पन्न गरेको छ ।
विद्यालयले आयोजना गरेको प्रतियोगितामा विद्यार्थीहरूको उत्साहजनक सहभागिता रहेको थियो । प्रतिस्पर्धामा प्रेमा देवी प्रथम, नेहा चौधरी द्वितीय तथा ममता कुमारी तृतीय हुन सफल भएका थिए ।
विजेता विद्यार्थीहरूलाई विद्यालयकी प्रिन्सिपल रुचिका कुमारी तथा निर्णायक मण्डलकी सदस्य रेखा जैसीले प्रमाणपत्र प्रदान गर्दै सम्मान गरेका थिए । प्रतियोगितामा सहभागी सबै विद्यार्थीलाई पनि प्रमाणपत्र प्रदान गरिएको विद्यालयले जनाएको छ ।
कार्यक्रममा उपस्थित अभिभावकहरूले विद्यालयले शिक्षासँगै अतिरिक्त क्रियाकलापलाई प्राथमिकता दिएकोमा प्रशंसा गरेका थिए । यस्ता प्रतियोगिताले बालबालिकाको प्रतिभा, सिर्जनशीलता र आत्मविश्वास विकासमा टेवा पुग्ने उल्लेख गर्दै आगामी दिनमा खेलकुद तथा अन्य सिर्जनात्मक कार्यक्रमहरू पनि निरन्तर आयोजना गर्न सुझाव दिएका थिए ।
कार्यक्रम विद्यालयकी प्रिन्सिपल रुचिका कुमारीको सभापतित्वमा सम्पन्न भएको थियो। प्रतियोगिताको निर्णायकको भूमिका माउन्ट मकालु बोर्डिङ स्कुलकी सहायक प्रिन्सिपल रेखा जैसीले निर्वाह गरेकी थिइन् भने कार्यक्रमको सहजीकरण सोही विद्यालयका प्रिन्सिपल राहुल श्रीवास्तवले गरेका थिए ।
विद्यालयले यस्ता अतिरिक्त क्रियाकलापमार्फत विद्यार्थीहरूको समग्र व्यक्तित्व विकासमा योगदान पुर्याउने उद्देश्यका साथ आगामी दिनमा पनि विभिन्न सिर्जनात्मक तथा शैक्षिक कार्यक्रमहरूलाई निरन्तरता दिने जनाएको छ ।
