वीरगञ्ज । कुमारी बैंक लिमिटेडले आफ्नो संस्थागत सामाजिक उत्तरदायित्व (सीएसआर) कार्यक्रमअन्तर्गत पर्साको बहुदरमाई नगरपालिका–५, भौराटारस्थित श्री नेपाल राष्ट्रिय सीताराम माध्यमिक विद्यालयलाई एक थान आरओ (RO) वाटर फिल्टर तथा १५० जना विद्यार्थीलाई विद्यालय झोला वितरण गरेको छ ।
स्थानीय युवा नेता जय साहको पहल तथा समन्वयमा आयोजित कार्यक्रममा बहुदरमाई–५ का वडाध्यक्ष सुनील महतो कोइरी, कुमारी बैंकका प्रदेश प्रमुख अंकित पाण्डेय, सञ्चालन प्रमुख रञ्जित यादव, बैंकका कर्मचारी, विद्यालय व्यवस्थापन समितिका पदाधिकारी, शिक्षक, विद्यार्थी तथा स्थानीय अगुवाहरूको उपस्थिति रहेको थियो ।
कार्यक्रममा कुमारी बैंकका प्रदेश प्रमुख अंकित पाण्डेयले बैंकले संस्थागत सामाजिक उत्तरदायित्वअन्तर्गत शिक्षा, स्वास्थ्य तथा समुदायसँग प्रत्यक्ष जोडिएका क्षेत्रमा आगामी दिनमा पनि यस्ता कार्यक्रमलाई निरन्तरता दिने प्रतिबद्धता व्यक्त गरे । निजी क्षेत्र र समुदायबीचको सहकार्यले सामाजिक विकासमा सकारात्मक योगदान पुग्ने उनको भनाइ थियो ।
वडाध्यक्ष सुनील महतो कोइरीले विद्यालय र विद्यार्थीका लागि आवश्यक सामग्री उपलब्ध गराएकोमा कुमारी बैंकप्रति आभार व्यक्त गर्दै कार्यक्रमका लागि पहल तथा समन्वय गरेका जय साहलाई धन्यवाद दिए ।
विद्यालयका प्रधानाध्यापक सञ्जय महतोले विद्यार्थीको शैक्षिक यात्रामा उपयोगी हुने विद्यालय झोला तथा विद्यालयमा स्वच्छ पिउने पानीको व्यवस्था गर्न आरओ फिल्टर उपलब्ध गराएकोमा कुमारी बैंकप्रति कृतज्ञता व्यक्त गरे ।
कार्यक्रमपछि सञ्चारकर्मीसँग संक्षिप्त कुराकानी गर्दै जय साहले समुदायको आवश्यकता पहिचान गरी निजी क्षेत्र, स्थानीय सरकार र सामाजिक संस्थाबीच सहकार्य बढाउनु समयको आवश्यकता रहेको बताए । शिक्षा, स्वास्थ्य तथा आधारभूत सेवासँग सम्बन्धित क्षेत्रमा आगामी दिनमा पनि यस्ता पहललाई निरन्तर अघि बढाउने उनको प्रतिबद्धता थियो ।
