वीरगंज । कुशवाहा मोटर्स वीरगंजले जिल्ला प्रशासन कार्यालय पर्साको निर्देशनसमेत बेवास्ता गरेको आरोप लागेको छ । केही दिनअघि कुशवाहा मोटर्सबाट खरिद गरिएको एउटा ई–स्कुटरमा आगलागी भएपछि छलफलका लागि प्रशासनले बोलाउँदा पनि कम्पनीका सञ्चालक उपस्थित नभएको पीडितले बताएका छन् ।
पीडित प्रदीप साहका अनुसार जिल्ला प्रशासन कार्यालय पर्साले दुई पटक समय तोकेर छलफलका लागि बोलाए पनि कुशवाहा मोटर्सका सञ्चालक उपस्थित भएका छैनन् ।
यस घटनासम्बन्धी पीडित प्रदीप साहले जिल्ला प्रशासन कार्यालय पर्सामा निवेदन दर्ता गर्दै आवश्यक छानबिन, क्षतिपूर्ति र कानुनी कारबाहीको माग गरेका छन् ।
निवेदनअनुसार २०८३ जेठ २१ गते बिहान करिब ७ः४० बजे उनका बुबा किशन साह कानुको नाममा दर्ता रहेको म.प्र.०३–०३९ प १४४३ नम्बरको ई–स्कुटर घरभित्र पार्किङ गरी राखिएको अवस्थामा अचानक ब्याट्री पड्किएर आगलागी भएको थियो ।
आगलागीबाट ई–स्कुटर पूर्ण रूपमा जलेर नष्ट हुनुका साथै आगो घरको प्यासेज, भुइँतल्लाको कोठा, विद्युत् लाइन, घरभित्रको सम्पूर्ण वायरिङ तथा इन्टरनेट राउटरसम्म फैलिएको निवेदनमा उल्लेख गरिएको छ ।
पीडितले उक्त घटनाबाट करिब ५ लाख रुपैयाँ बराबरको क्षति भएको दाबी गरेका छन् । आगलागी भएको ई–स्कुटर वीरगंजस्थित कुशवाहा मोटर्सबाट खरिद गरिएको उल्लेख गर्दै विक्रेता पक्षलाई जिम्मेवार ठहर गरी कानुनबमोजिम क्षतिपूर्ति दिलाइदिन प्रशासनसँग माग गरिएको छ ।
पीडितले जिल्ला प्रशासन कार्यालयमार्फत विक्रेता पक्षलाई उपस्थित गराई घटनाको निष्पक्ष छानबिन, क्षतिको यथार्थ मूल्याङ्कन तथा कानुनअनुसार क्षतिपूर्ति दिलाउन माग गरेका छन् ।
