वीरगंज । श्री गहवामाई तीर्थ क्षेत्र विकास समितिको आयोजनामा शनिबार वीरगंजस्थित माईस्थान मन्दिर परिसरमा निःशुल्क स्वास्थ्य शिविर सम्पन्न भएको छ । आगामी असार ३२ गते आयोजना हुने गहवामाई रथयात्रालाई लक्षित गर्दै शिविर सञ्चालन गरिएको हो ।
समितिका अध्यक्ष श्याम पोखरेल, उपाध्यक्ष देवानन्द कलवार, सचिव पप्पु गुप्ता र कोषाध्यक्ष रवि अग्रवाल सम्मिलित समितिले गठन गरेको उपसमितिका संयोजक श्याम गुप्ताको नेतृत्वमा आयोजित शिविरको उद्घाटन चिकित्सक डा. मनोज गुप्ताले गरेका थिए ।
आर्थिक अभावका कारण गुणस्तरीय स्वास्थ्य सेवाबाट वञ्चित श्रद्धालु तथा सर्वसाधारणलाई सहज रूपमा स्वास्थ्य सेवा उपलब्ध गराउने उद्देश्यले प्रत्येक वर्षझैँ यस वर्ष पनि निःशुल्क स्वास्थ्य शिविर सञ्चालन गरिएको समितिले जनाएको छ ।
समितिका सचिव पप्पु गुप्ताका अनुसार शिविरबाट ३५५ जनाले स्वास्थ्य परीक्षण तथा परामर्श सेवा लिएका छन् । शिविरमा आँखा, दाँत, हाडजोर्नी तथा कानसम्बन्धी रोगको परीक्षणसँगै मधुमेह र थाइराइड परीक्षण तथा विशेषज्ञ चिकित्सकबाट परामर्श सेवा प्रदान गरिएको थियो ।
उपसमितिका संयोजक श्याम गुप्ताका अनुसार शिविरका क्रममा मोतियाबिन्दु पहिचान भएका बिरामीहरूको समितिको पहलमा निःशुल्क शल्यक्रिया गरिने व्यवस्था समेत मिलाइएको छ ।
कार्यक्रममा सहसंयोजक अनुप कुमार अग्रवाल तथा समितिका सदस्यहरू ओशन गुप्ता, राजन गुप्ता, ललित अग्रवाल, विवेक कुमार, मुन्ना सर्राफलगायतको सक्रिय सहभागिता रहेको थियो ।
