वीरगञ्ज । नेशनल मेडिकल कलेज, वीरगंजको आयोजनामा तथा चिकित्सा शिक्षा विभाग, इन्स्टिच्युट अफ मेडिसिन (IOM), काठमाडौंको सहकार्यमा सञ्चालित ६ दिने फ्याकल्टी डेभलपमेन्ट ट्रेनिङ (Faculty Development Training–FDT) शुक्रबार सम्पन्न भएको छ ।
असार ७ देखि १२ गतेसम्म सञ्चालन भएको उक्त तालिम चिकित्सा शिक्षाको गुणस्तर अभिवृद्धि, आधुनिक शिक्षण पद्धतिको प्रवर्द्धन तथा शिक्षकहरूको शिक्षण क्षमता विकास गर्ने उद्देश्यका साथ आयोजना गरिएको थियो ।
नेशनल मेडिकल कलेजका प्रिन्सिपल प्रा. डा. के.एन. सिंहकाे अध्यक्षता र नेशनल मेडिकल कलेजका अध्यक्ष प्रा. डा. जैनुद्दीन अन्सारी प्रमुख अतिथ्यतामा भएकाे समापन समाराेहमा इन्स्टिच्युट अफ मेडिसिनका प्रा. डा. निर्जु रञ्जित, प्रा. डा. संघरत्न बज्राचार्य तथा प्रा. डा. रमेश आचार्यले मन्तव्य राखेका थिए ।
कलेजको IBMS ब्लकस्थित कन्फरेन्स हलमा भएकाे समापन समारोमा नेशनल मेडिकल कलेजका अस्पताल निर्देशक डा. इशरत जहान, एडमिसन तथा मार्केटिङ निर्देशक आबिद हुसेन अन्सारी, उप–प्राचार्य डा. रविशंकर गुप्ता तथा नेशनल मेडिकल कलेज नर्सिङ क्याम्पसकी उप–प्राचार्य प्रा. डा. बबिता सिंह लगायतको उपस्थिति रहेको थियो ।
कार्यक्रममा सहभागी प्रशिक्षार्थीहरूले तालिमबाट प्राप्त अनुभव तथा सिकाइ साझा गरेका थिए । वक्ताहरूले फ्याकल्टी डेभलपमेन्ट कार्यक्रमले चिकित्सा शिक्षामा आधुनिक शिक्षण विधि, प्रभावकारी विद्यार्थी मूल्याङ्कन, अनुसन्धान प्रवर्द्धन तथा व्यावसायिक दक्षता अभिवृद्धिमा महत्वपूर्ण योगदान पुर्याउने विश्वास व्यक्त गरे ।
प्रमुख अतिथि प्रा. डा. जैनुद्दीन अन्सारीले संस्थाले शैक्षिक उत्कृष्टतालाई थप मजबुत बनाउन यस्ता क्षमता अभिवृद्धिमूलक कार्यक्रमलाई निरन्तरता दिने प्रतिबद्धता व्यक्त गर्दै प्रशिक्षक तथा सहभागी सबैप्रति आभार व्यक्त गरे ।
